Bu gün Bakıda Avropa Şurasının “Mədəniyyətlərarası dialoq: mədəniyyətlə dinin qarşılıqlı əlaqəsi” mövzusunda iclası keçirilir
Sözügedən konfransın məqsədi mədəniyyətlərarası və dinlərarası əməkdaşlıq sahəsində təcrübə mübadiləsi aparmaq, bu əməkdaşlığı genişləndirməyə təkan və töhfə vermək, həmçinin bütün Avropa məkanında arzuedilən anlaşma mühitinin yaradılmasıdır.
Lakin məqsədi anlaşmaya nail olmaq olan tədbirdə bəzi məsələrdə anlaşma əldə etmək mümkün olmayıb. Belə ki, “Mədəniyyətlərarası dialoq: mədəniyyətlə dinin qarşılıqlı əlaqəsi” adlı konfransın yekun qətnaməsinin qəbulu zamanı iclas iştirakçıları arasında fikir ayrılığı yaranıb.
Virtualaz.org saytının tədbirdə iştirak edən müxbirinin verdiyi xəbərə görə, konfrans iştirakçıları Suriya və İraqda müsəlmanların radikal qruplar tərəfindən qətlə yetirilməsini pisləyən bəndin yekun sənədə daxil edilməsinə razılıq verməyiblər. Onlar yalnız xristianların məhv edilməsini pisləyən bəndlə kifayətlənməyə çalışıblar.
Bu isə Azərbaycanın Avropa Şurası yanındakı daimi nümayəndəsi, səfir Emin Eyyubovun etirazına səbəb olub. Müsəlmanların qətlə yetirilməsi barədəki bəndi də yekun qətnaməyə salmağı E.Eyyubov təklif etmişdi.
“Axı biz görürük ki, İraq və Suriyada hər gün nə qədər müsəlman - həm sünnilər, həm də şiələr radikal qruplar tərəfindən qətlə yetirilir. Biz bunları niyə görməzliyə vurub yalnız təkcə xristianların qətlindən danışmalıyıq? Əlbəttə, dinindən asılı olmayaraq istənilən insanın öldürülməsi faciədir. Ona görə də biz yalnız bir dinə mənsub olan insanlara qarşı cinayətlərdən danışmamalıyıq. Əgər burada insan haqlarından danışırıqsa, onda bütün insanlara və insaniyyətə olan cinayətlərdən söz açmalıyıq” - deyə səfir E.Eyyubov bildirib.
Azərbaycan nümayəndəsinin bu bəyanatı sənəd müəlliflərini çaşqınlığa saldı. Onlar qətnamənin yeni mətnini hazırlamaq üçün 10 dəqiqə fasilə verilərək vaxt ayrılmasını xahiş etdilər. Lakin bu fasilədən sonra da sənədin mətni ətrafında anlaşma əldə etmək mümkün olmadı. Bəzi dini qrupların nümayəndələri müsəlmanların qətlə yetirilməsinin pislənilməsinə dair bəndin yekun sənədə daxil edilməsinə razılıq vermədilər.
Beləliklə, yekun sənəd qəbul edilmədi. Konfrans iştirakçıları sadəcə bu istiqamətdə işləri davam etdirməyin vacibliyi məsələsində razılığa gələ bildilər.