PİA.AZ-ın Azərbaycan Yazıçılar Birliyinin Mətbuat xidmətinə istinadən verdiyi məlumata görə, dünən Nərimanov rayon məhkəməsində Azərbaycan Yazıçılar Birliyi sədrinin müşaviri Rauf Aslanovun Ramiq Muxtara qarşı qaldırdığı iddia tələbi təmin olunub
Xatırladaq ki, Rauf Aslanov Ramiq Muxtara qarşı şərəf və ləyaqətinin müdafiəsi, üzr istəməsi, dəymiş mənəvi zərərin ödənilməsinə dair iddia irəli sürmüşdü. Rauf Aslanovun iddiasına görə, Ramiq Muxtar mətbuatda çıxış edərək, ona bir sıra böhtanlar atmış, bundan başqa, şərəf və ləyaqətini alçaldan ifadələr işlətmiş, işgüzar nüfuzuna xələl gətirən ittihamlar irəli sürmüş, eləcə də, ağır cinayət törətməkdə suçlamışdı.
Hakim Abbas Əliyevin sədriliyilə 3 ay sürən məhkəmə prosesi Ramiq Muxtarın ittihamlarının əsassız olduğunu sübuta yetirmiş, Rauf Aslanovun iddiası qismən təmin edilmişdir. Məhkəmə Ramiq Muxtarın mətbuatda “Azərbaycan Yazıçılar Birliyinin sədrinin müşaviri, mənzil komissiyasının sədri Rauf Aslanovun barəsində yuxarı dövlət orqanlarına ünvanladığım şikayət ərizələrinin və kütləvi informasiya vasitələrinə verdiyim müsahibələrimin dəlillərinin böhtan xarakterli olduğunu etiraf edir və Aslanov Rauf Kərim oğlundan üzr istəyirəm” - məzmunlu təkzib verməsi barədə qətnamə çıxarıb.