Arif Hacılının barış müraciətinə cəbhəçilər reaksiya

Müsavat başqanı basqılara baxmayaraq, bu istiqamətdə fəaliyyətini davam etdirəcəyini bəyan elədi

Sosial şəbəkədə “Yeni Müsavat” qəzetinin baş redaktoruna qarşı həyata keçirilən mənəvi terror və tərbiyəsizlik cəmiyyət tərəfindən pislənilir.

Bir sıra tanınmış ictimai-siyasi xadimlər eyni zamanda AXCP sədri Əli Kərimliyə və “Yeni Müsavat”ın baş redaktoru Rauf Arifoğluya müraciət edərək münaqişəni durdurmağa çağırıblar.

Bu sırada Müsavat Partiyasının başqanı Arif Hacılının dekabrın 18-də yaydığı müraciət xüsusi diqqət çəkir. Ə.Kərimliyə yaxın şəxslər isə barışa çağıranı belə dərhal hədəfə götürüblər, A.Hacılının ünvanına olmazın fikirlər yazıb. Belə görünür ki, bu adamlar onların tərbiyəsizliyinə şərik olmayan, sülhə çağıran hər kəsi bir anın içində təhqir eləməyə hazırdırlar. Dayanmadan A.Hacılının facebook səhifəsinə yazır, onun barışa çağırış məzmunlu müraciətini pisləyir və mövqeyini dəyişməsini tələb edirlər. Eyni zamanda A.Hacılıdan öz partiyasının daxili işləri ilə məşğul olmağı tələb edirlər. Bu isə əslində R. Arifoğluya qarşı həyata keçirilən mənəvi terror kampaniyasının AXCP-nin daxili siyasəti olmasının etirafıdır. Onu da qeyd edək ki, bu cür kampaniya “Yeni Müsavat” qəzetinin dəstəyinə deyilmiş hər bir sözün müəlliflərinə qarşı aparılmaqdadır. Barış çağırışlarının isə təhqirlə cavablandırılması xüsusilə heyrət yaradır.

Müsavat başqanı Arif Hacılı ilə əlaqə saxlayıb müraciətinə cəbhəçilərin bu cür reaksiyasına münasibətinin necə olduğunu soruşduq. A. Hacılı bildirdi ki, hər hansı reaksiyaya və basqılara baxmayaraq, barış mühiti yaranması istiqamətində fəaliyyətini davam etdirəcək: “Ölkədə elə vəziyyət yaradılıb ki, bu vəziyyət müxalifət qüvvələri arasında barış mühitini yaranmasını, qarşılıqlı ittihamların aradan qalxmasını zəruri edir. Barışıq mühiti yaranması vacibdir.

Üzərimə olan basqılara baxmayaraq, bu istiqamətdə fəaliyyətimi davam etdirəcəyəm”.

“Yeni Müsavat” qəzetinin baş redaktoru Rauf Arifoğlu isə musavat.com-a deyib ki, bir dəstə siyasi avara sosial şəbəkədə məskən qurub və burada 24 saatlıq rejimlə, növbə çəkirlər. Və onlar “Yeni Müsavat”la, onun baş redaktoru ilə bağlı aqressiv kampaniya aparırlar, qəzeti dəstəkləyən insanları abırdan salırlar: “Onlara baş qoşmağa vaxtımız yoxdur. Lakin hərdən cavab veririk. Bir dəstə AXCP üzvü onlar kimi düşünməyən və liderlərinə biət etməyən hər kəsi mənəvi terror edir. Biz təsbit etmişik ki, AXCP sədri özü də psevdonimlə, saxta profillə yazışmalarda fəal iştirak edir, söyüş söyür, aranı qızışdırır. Mən bütün bu işləri və sifətləri ona yaraşdırıram. Davam etsin, bu yolda onu böyük gələcək gözləyir”. (musavat.com)