16 yaşlı qız öldü
Bakıda avtomobil qaçıran yeniyetmələr ağır qəzaya düşüb. PİA.AZ-ın Daxili İşlər Nazirliyinin mətbuat xidmətinə istinadən verdiyi məlumata görə, dekabrın 14-ü saat 05 radələrində Abşeron rayonu Ceyranbatan qəsəbəsinin ərazisində Zərdab rayon sakini Fərid Həbibi idarə etdiyi “VAZ-2106” markalı avtomobili Samur-Abşeron kanalına aşırıb. Onun sərnişinlərindən-Ucar rayon sakini Zəhra Fətəliyeva suda boğulub. Özü və digər sərnişini Bakı şəhər sakini Məhəmməd Mehdiyev xəstəxanaya yerləşdiriliblər.
Araşdırmalar zamanı qeyd edilən avtomobilin Gürcüstan vətəndaşı Namiq Hüseynova məxsus olması və həmin gün Nəsimi rayonu R.Məmmədov küçəsindən F.Həbibi tərəfindən qaçırılması, Masazır qəsəbəsinə sürüb, qəsəbə sakini Ramin Əmircanova məxsus mağazadan pəncərədən girmək yolu ilə 50 manat pul və tütün məmulatı oğurlaması müəyyən edilib.
Faktla əlaqədar Azərbaycan Respublikası Cinayət Məcəlləsinin müvafiq maddələri ilə cinayət işi başlanıb. Abşeron rayon polis şöbəsi tərəfindən araşdırma aparılır.
Qeyd edək ki, 17 yaşlı F.Həbibi dostları ilə birlikdə qonşuluqda yaşayan Namiq Hüseynovun 01 BC 821 nömrə nişanlı avtomobilini qaçırıb. Qəza zamanı avtomobildə olan F.Həbibinin dostu, 16 yaşlı Zəhra Fətəliyeva avtomobildən çıxa bilməyib və suda boğularaq ölüb.
FOTO: Lent.az