Azərbaycan analar üçün yaradılan ən yaxşı şəraitə görə reytinq cədvəlində 90-cı yeri tutur
Virtualaz.org saytı Qərb KİV-lərinə istinadən xəbər verir ki, bu barədə “Save the Children” beynəlxalq təşkilatının dərc etdiyi hesabatda deyilir.
Təşkilat 179 ölkədə araşdırma aparıb. Nəticədə məlum olub ki, azyaşlı uşaqları olan analar üçün ən ideal şərait Norveçdədir. Bu ölkədə analar üçün hər cür şərait yaradılıb. Ən yaxşı şəraitə malik olan ölkələrin ilk “onluğu”na Norveçdən sonra aşağıdakı ölkələr daxildir: Finlandiya, İslandiya, Danimarka, Almaniya, Niderland, İsveç, İspaniya, Belçika, Avstraliya.
Azərbaycanın qonşularından Gürcüstan reytinq cədvəlində 86-cı, Rusiya 56-cı, Türkiyə 65-ci, Ukrayna 69-cu, Ermənistan isə 109-cu yerdədir.
Reytinq cədvəli tərtib olunarkən uşaq doğub böyütməyin sosial baxımdan hansı ölkədə daha rahat və əlverişli olmasını göstərən meyarlar nəzərə alınıb.
Bu şəraitin ən pis olduğu ölkələr arasında isə Çad, Fil Dişi Sahili, Qambiya, Niger, Konqo, Somali və Mərkəzi Afrika Respublikası öndə gedir.
pia.az