Azərbaycanda 45 mindən artıq çoxuşaqlı ailə var

Azərbaycanda 5 və daha çox uşaqlı ailələrin sayı 45.8 mindir

Dövlət Statistika Komitəsindən Lent.az-ın sorğusuna verilən cavaba görə, uşaqların sayına görə ev təsərrüfatlarının bölgüsü haqqında statistik məlumatlar ölkəmizdə 10 ildən bir keçirilən əhalinin siyahıyaalınması zamanı əldə edilir.

Məlumatda bildirilir ki, uşaqların sayına görə ev təsərrüfatlarının bölgüsü beynəlxalq müqayisəlik üçün 1 uşaqlı, 2 uşaqlı, 3 uşaqlı, 4 uşaqlı, 5 və daha çox uşaqlı kimi işlənib.

Son dəfə 2009-cu ildə keçirilmiş əhalinin siyahıyaalınmasının yekun məlumatlarına əsasən, ölkə üzrə 3 uşaqlı ev təsərrüfatlarının sayı 261,8 min, 4 uşaqlı ev təsərrüfatlarının sayı 80,8 min, 5 və daha çox uşaqlı ev təsərrüfatlarının sayı isə 45,8 min olub.

5 və daha çox uşaqlı ev təsərrüfatlarının əsasən Cəlilabad, Lerik, Yardımlı, Masallı rayonlarında və Gəncə şəhərində üstünlük təşkil etdiyi də qeyd edilib.

Onu da qeyd edək ki, “Beşdən çox uşağı olan qadınlara müavinətin məbləğinin müəyyən edilməsi haqqında” ölkə prezidentinin fərmanına əsasən, 2014-cü il yanvarın 1-dən beşdən çox uşağı olan qadınlara müavinətin məbləği hər uşaq üçün 30 (otuz) manat müəyyən edilib.

Fərmana əsasən, ötən ilin əvvəlindən beşdən çox uşağı olan qadınların 18 yaşına çatmamış hər bir uşağına görə 30 manat məbləğində aylıq sosial müavinət təyin olunaraq ödənilir. Hazırda Əmək və Əhalinin Sosial Müdafiəsi Nazirliyi (ƏƏSMN) tərəfindən ölkəmizdə beşdən çox uşağı olan 3077 nəfər qadının 18 yaşına çatmamış 8810 nəfər uşağına həmin aylıq sosial müavinət ödənilir. Bununla yanaşı, 3 və daha çox uşaq doğub 8 yaşınadək, yaxud sağlamlıq imkanları məhdud övladını 8 yaşınadək tərbiyə etmiş qadınlar 57 yaşına çatdıqda onlara aylıq sosial müavinət təyin olunur. Ölkədə 7612 nəfər qadın bu növ sosial müavinətlə təmin edilir.

pia.az