Oktyabrın 28-də Bakıda keçirilməsi nəzərdə tutulan Dünya Azərbaycanlı İş Adamlarının Forumu təxirə düşüb
BakıPost.az-a daxil olan məlumata görə, bu gözlənilməz qərar Diasporla İş Üzrə Dövlət Komitəsində şok effekt yaradıb. Bütün təşkilati məsələlərin yekunlaşması, xarici iştirakçılara dəvətlərin göndərilməsindən sonra tədbirin ləğvi ciddi narahatlığa səbəb olub.
Artıq dəvət olunan şəxslərə tədbirin baş tutmayacağı barədə məktub göndərilib. Prezident İlham Əliyevin də iştirakı nəzərdə tutulan tədbirin təxirə düşməsinin dəqiq səbəbləri bilinməsə də, qərarın birinci şəxs tərəfindən verildiyi şübhə doğurmur. Ehtimal olunur ki, Nazim İbrahimovun təqdim etdiyi iştirakçı siyahısı birmənalı qarşılanmayıb. Siyahıya salınan adlar və tədbirin ssenarisi Forumun daha çox formal xarakter daşıyacağı fikrini yaradıb. Buna görə də, tədbirin təxirə salınması göstərişi verilib.
Qeyd edək ki, forum barədə məlumatı dünən Diasporla İş Üzrə Dövlət Komitəsi yayımışdı. Məlumatda bildirilirdi ki, 28 oktyabrda “Fairmont” otelində baş tutacaq açılış törənində Prezident İlham Əliyev də iştirak edəcək. Forumda kənd təsərrüfatı, konsaltinq, ticarət, informasiya texnologiyaları, nəqliyyat və logistika, neft sənayesi, tekstil, bank sektoru və digər sahələrdə sahibkarlıq fəaliyyəti ilə məşğul azərbaycanlı iş adamları iştirak edəcək. Azərbaycan Respublikasından kənd təsərrüfatı, qida sektoru, tikinti və inşaat, neft, informasiya-kommunikasiya texnologiyaları (İKT), tekstil, tikiş, habelə digər sahələrdə çalışan iş adamlarının da forumda iştirakı gözlənildiyi bildirilirdi.
Məsələ ilə bağlı Baki Post.az-ın əməkdaşı komitənin mətbuat xidməti ilə əlaqə saxalayıb. Xidmət əməkdaşları xəbəri təkzib etməyiblər: “Bu məlumat sizə haradan daxil olub? Bu barədə bizdə dəqiq məlumat yoxdur. Hazırda bu haqda dəqiqləşdirmələr aparılır”.
pia.az