Azərbaycanda avtomobillərin kreditlə satışının dayanması sürücüləri və avtomobil satıcılarını müxtəlif üsullara əl atmağa vadar edib
Avtomobil ekspertləri fins.az-a bildiriblər ki, avtomobil bazarının əsas hərəkətverici mexanizmi avtomobil kreditləri idi. Kreditlərin dayanması ilə avtomobil bazarında böhran yaradıb. Belə olan halda, satıcılar da müxtəlif yollarla satışları artırmağa can atırlar. Nəticədə, avtomobil sahibləri və bazarlarda olan salonlarda işlənmiş avtomobillərin kreditlə, etibarnamə və ehtiyat hissəsi kimi satışı halları artıb.
Qeyri–rəsmi kreditlə avtomobil satışı 2 dəfə artıb
Ekspertlər hesab edirlər ki, bank kreditlərinin avtomobil bazarından çıxması etibarnamə ilə satış hallarını ilin əvvəlindən 2 dəfə artırıb. Avtomobil eksperti Fərid Məlikov sayta bildirib ki, son dövrdə avtomobil bazarının canlanması üçün avtomobil sahibləri, alverçi və salonlar müxtəlif qaydada satış üsullarına əl atırlar. Bunlardan biri avtomobil bazarlarındakı salonlardır. Bu tipli satış yerləri avtomobilləri qeyri-rəsmi qaydada kreditlə satırlar. Bu qaydada satışları salonlar sadəcə müştərinin görünüşünə baxaraq şəxsiyyət vəsiqəsilə verirlər.
Ekspertin sözlərinə görə, satıcılar əvvəlcə avtomobili alan şəxsin evinə baxış keçirirlər, yəni harda yaşadığını müəyyən edirlər. Daha sonra müştəri ilə salon arasında notariusda təsdiqlənmiş müqavilə bağlanır.
Salonlar müştərinin görünüşünə baxıb maşını kreditə verirlər
Avtomobilin dəyərinin bir hissəsi əvvəlcədən ödənilir. Qalan hissə isə aylara bölünərək ödəniş həyata keçirilir. Bu şərt hər iki tərəf üçün uyğundur. Belə ki, salonlar bir neçə ayda satılmayan avtomobilləri kreditlə daha baha və tez sata bilirlər. Məsələn, nağd şəkildə 15 min manata satılan 2012-ci il model “Hyundai Sonata” kreditlə 20 min manata təklif edilir. Digər tərəfdən, bəzi vətəndaşlar avtomobil almaq istəsələr də nağd ödəniş etmək imkanları yoxdur. Üstəlik rəsmi maaşı olmadığı və rayon qeydiyyatında olduğuna görə kredit götürə bilmirlər. Belə alıcılar üçün sadə şəkildə heç bir sənəd tələb olunmadan avtomobil almaq göydən düşmə fürsətə çevrilir. Ona görə də qeyri-rəsmi kreditlə alışa razılaşırlar.
Kreditə maşın aldığına peşman olanlar onu eyni qayda ilə satır
Ekspertin sözlərinə görə, bundan əlavə avtomobili əvvəl bank krediti ilə alanlar isə borcu ödəyə bilmədikləri üçün satmağa başlayıblar. Onlar kreditdən qurtulmaq üçün maşını satırlar. Ödədikləri məbləğə daha ucuz qiymətə köhnə “Mercedes” və az xərc aparan Rusiya avtmobilləri alırlar. Belə avtomobil sahibləri isə sürücülük etibarnaməsi ilə satış həyata keçirirlər. Məsələn, avtomobili 15 manata alan sürücü 20-30 min kilometr sürdükdən sonra, ilkin olaraq ödədiyi 5 min manatın nağd verilməsini, qalan hissənin isə banka aylıq ödənilməsi şərtilə satdı. Əvəzində sürmək üçün 1997-ci ilin “Mercedes” avtomobilini 4500 manata aldı. Köhnə olsa da, həm avtomobili var, həm də kredit ödəməkdən xilas olub.
Kreditdəki maşını alanların borcu qaytarmamaq şansı yoxdu
Avtomobili alan müştərinin krediti ödəməsi isə bir neçə aylıq sürücülük etibarnaməsi ilə sığortalanır. Yəni, avtomobili kreditlə alan müştəri borcunu tam ödəməyənə kimi onun sahibi olmur. Yalnız etibarnaməyə uyğun olaraq sürücülük hüququ olur. Krediti tam ödədikdən sonra isə avtomobilin texniki pasportunu əldə edə bilir.
Satılmayan maşınlar ehtiyat hissəsi kimi 3-4 min baha satılır
Yeni satış üsulları bununla da bitmir. Bəzi avtomobil sahibləri avtomobili satışa çıxardıqları halda uzun müddət sata bilmədikləri üçün onu ehtiyat hissəsi kimi satışa çıxarırlar. Ekspert hesab edir ki, belə satış bir neçə ay vaxt aparsa da, avtmobilin hər bir vinti belə pul gətirir. Səbrli satıcılar bütöv halda maşını ucuz sata bilərdilərsə, bu qayda ilə 2-3 min manat daha çox gəlir əldə edə bilirlər.
Məsələn, ötən ay avtomobil sahiblərindən biri 6-7 min manata sata bilmədiyi 2000-ci il model “Mercedes C Class” avtomobilini 2-3 ay ərzində ehtiyat hissəsi kimi 10 min manata satmışdı. Amma bu tipli satışı da hər sürücü həyata keçirə bilmir. Ehtiyat hissəsi kimi satışları daha çox boksda və ya profilaktoriyada tanışı olan və bu sahədə təcrübəsi olanlar həyata keçirir.
Kreditlə satılan maşın elanları 50 % artıb
Avtomobil bazarı ilə yanaşı avtomobil elan saytlarında da kreditlə aldığı avtomobili satışa çıxaranlarla bağlı təkliflər artıb. Alsat.az saytının rəhbəri Vaqif Hüseynov bildirib ki, ötən ildən etibarən bu tipli elanlar 50 % artıb. Məsələn, ötən il hər 10 elandan 2-si kreditlə satışla bağlı idisə, indi hər elandan 5-I belə satış təklifidir.
Onun sözlərinə görə, qiyməti 50 min dollara kimi olan avtomobillərin kreditlə satışı təklif edilir. Belə ki, satıcılar avtomobilin real bazaar qiymətini ilkin ödəniş olaraq tələb edirlər. Qalan hissənin isə aylıq ödənişini təklif edirlər. Məsələn, 2012-ci il model “Toyota Land Cruiser” avtomobilinin qiyməti 50 min dollardır. Satıcı 40 min manatın əvvəlcə, qalan hissəsinin isə aylıq ödənişini təklif edir.
pia.az
Digərxəbərlər
Populyar xəbərlər
