Paytaxtda partlayan su borusu nəqliyyatın hərəkətini çətinləşdirib
ANS TV-nin məlumatina görə, hadisə dünən Binəqədi rayonu ərazisində baş verib. Biləcəri qəsəbəsində aparılan inşaat işləri zamanı ərazidən keçən su borusu zədələnib və bundan sonra borudan 4 metr hündürlüyündə fontan vurmağa başlayıb.
Bu, yaxınlıqdakı ərazidən keçən Bakı-Sumqayıt yolunda nəqliyyatın hərəkətində problemlər yaradıb.
Bəzi sürücülər üçün bu hal problemə çevrilsə də, partlayan borudan sözün həqiqi mənasında sui-istifadə edənlər də tapılıb. Borudan çıxan su aylardır avtomobilini yumayan bəzi sürücülərə avtoyuma xidmətindən pulsuz yararlanmağa imkan yaradıb.
Ərazidə inşaat işləri aparan şirkətin nümayəndələri bir neçə dəfə cəhd etdikdən sonra partlayan borudan çıxan suyun qarşısını ala biliblər.
Qeyd edək ki, Ceyranbatan gölündən ötürülən su bir neçə rayon ərazisinə məhz bu boru vasitəsilə paylanılır.