Paytaxta meyvə-tərəvəz satmağa gətirən maşın qəzaya düşdü.
ANS TV-nin məlumatına görə, hadisə zamanı Bayraq Meydanından üzü şəhərə doğru hərəkət edən “Ford” markalı avtomaşınla “Hovo” markalı yük maşını toqquşub. Qəzadan sonra “Ford”da olan bir nəfər sərnişin deformasiyaya uğrayan avtomaşında sıxılmış vəziyyətdə qalıb. Onu xilas etmək üçün hadisə yerinə FHN-nin xilasediciləri cəlb olunub. Xilasedicilər avtomaşında qalan sərnişini çıxararaq hadisə yerində olan Təcili Tibbi Yardım Stansiyasının həkimlərinə təhvil veriblər.
Hadisəni törədən “Ford” markalı avtomaşının sahibi əyalətdən paytaxt bazarlarına zoğal gətirirmiş. Qəza nəticəsində məhsulun böyük bir qismi yola dağılaraq məhv olub.
Qəzadan sonra əraziyə Səbail rayon Polis İdarəsinin əməkdaşları cəlb olunub. Araşdırmalardan sonra məlum olub ki, qəzadan əvvəl hər iki avtomaşın eyni istiqamətdə hərəkət edib. “Ford”un sürücüsü anidən idaretməni itirdiyindən maşını qarşıda hərəkətdə olan yük maşının arxa təkərlərinə çırpıb. Qəza ilə bağlı araşdırmalar davam etdirilir.