Bu seçkili orqanın statusunun azaldılacağı barədə xəbərlər dolaşır; ekspert bunun yolverilməz olduğunu bildirir
Bu ilin dekabrında Azərbaycanda bələdiyyə seçkiləri keçiriləcək. Bu seçkili orqanın statusunun azaldılacağı barədə xəbərlər dolaşır. Bələdiyyələrin vaxtından əvvəl buraxılması, üzvlərinin fəaliyyətinin dayandırılması və hesabatın verilməsi ilə bağlı qaydalar dəqiqləşdirilir. Maraqlıdır, görəsən bələdiyyə seçkiləri öncəsi bələdiyyələrin statusları ilə bağlı hər hansı bir dəyişiklik nəzərdə tutulurmu?
Konstitusiya Araşdırmaları Fondunun rəhbəri Əliməmməd Nuriyev bələdiyyələrin səlahiyyətlərinin məhdudlaşdırılmasının yolverilməz olduğunu bildirdi: “Bələdiyyələr konstitusion institutdur. İstənilən halda bələdiyyələrin hüquqlarını məhdudlaşdırmaq yolverilməzdir. Düşünürəm ki, bələdiyyələrin statuslarını dəyişdirmək istiqamətində işlər aparmaq daha zəruridir. Bələdiyyələrlə yeri icra nümayəndələri arasında bəzi vəzifələr üst-üstə düşür. Hesab edirəm ki, ərazi icra nümayəndələrinə aid bəzi işlərin bələdiyyələrə keçməsi daha doğrudur. Bələdiyyələrin yetərincə səlahiyyətləri var. Sadəcə maliyyə resursları yoxdur. Bu baxımdan səlahiyyətlərin resurslara uyğunlaşdırılması prosesi olmalıdır. Zaman-zaman biz bu istiqamətdə işlər görmüşük. Real olaraq, bələdiyyələr müstəqil bir quruma çevrilməlidir. İstisna müstəqilliyə malik olmalıdırlar. Onların işinə müdaxilə etmək imkanı olmamalıdır.
Düşünürəm ki, Milli Məclis bu istiqamətdə işlər görüləcək. Parlamentin Regional əlaqələr komitəsinin sədri Arif Rəhimzadə bələdiyyələrlə bağlı problemləri yaxşı bilir. Bu istiqamətdə onun əhəmiyyətli təşəbbüsləri olub. Bundan əlavə bələdiyyələrin birləşdirilməsi ilə bağlı bəzi fikirlər səsləndirilib. Bu proses hazırda davam edir. Hesab edirəm ki, bələdiyyələrin statuslarının dəqiqləşdirilməsi istiqamətində konkret işlərin görülməsi zamanıdır. Bu seçkili orqanın səlahiyyətlərinin məhdudlaşdırılmasının tərəfdarı deyiləm. Bu, demokratik prinsiplərə mane ola bilər. Əksinə, bələdiyyələrin səlahiyyətlərinin artırılmasının tərəfdarıyam. Prinsipal mövqeyim ondan ibarətdir ki, Avropada bələdiyyələrə verilən səlahiyyətlər bizdə də tətbiq olunmalıdır. Onlara ”yarım dövlət" statusu verilməlidir".
Hüquqşünas bələdiyyə üzvlərinin fəaliyyətinə vaxtından əvvəl xitam verilməsi ilə bağlı müzakirə edilən məsələyə də münasibət bildirdi: “Əgər bələdiyyə üzvü üzərinə düşən işi yerinə yetirmirsə, qanunvericiliyin tələblərinə əməl etmirsə, seçiciləri qarşısında hesabatlı deyilsə, belə bir üzvün işinə qanunvericilik üzrə baxılması müsbət tapıntı olar. Çünki bələdiyyə üzvü seçilərkən 5 il müddətinə heç bir məsuliyyət hiss etmir. Hesab edir ki, əhali onu seçməkdə borculudur. Amma bütün bu işlər ciddi sürətdə araşdırmalıdır. Şəffaf olmalıdır. Qanunları mütəmadi olaraq pozan, rüşvətdə adı hallanan üzvlərin işinə xitam verilməlidir. Bunun üçün həmin ərazidə yaşayan seçicilərin fikirləri nəzərə alınmalıdır. Bu zaman mütləq tarazlıq saxlanılmalı, hər şey ədalət çərçivəsində olmalıdır”.(musavat)
Digərxəbərlər
Populyar xəbərlər
