Çimərliklərdə skuter sürmək niyə qadağandır?

Çimərlik ərazisində skuterin idarə olunması qadağandır

Bunu Trend-ə açıqlmasında Fövqəladə Hallar Nazirliyinin Dövlət Sularda Xilasetmə Xidmətinin sektor müdiri Mansur Piriyev deyib.

Onun sözlərinə görə, sularda nəqliyyat vasitələri, eyni zamanda, skuterlər ancaq işarələnmiş müəyyən xətt üzrə idarə olunmalıdır. Bunu insanların orada istirahətdə olmaları ilə əlaqələndirən sektor müdiri həm istirahət obyektlərini, həm də əhalini təhlükəsizlik qaydalarına riayət etməyə çağırıb: “İlk növbədə, 18 yaşına çatmayanlara skuterləri idarə etmək olmaz. Bu, qəti qadağandır. Sürücülük vəsiqəsi olmayanlara, spirtli içki qəbul etmiş şəxslərə də skuter vermək düzgün deyil. Bununla yanaşı, skuterləri icarəyə verən istirahət obyektləri də bilməlidir ki, həm küləkli havada, həm də hava qaralan zaman insanları bu nəqliyyat vasitələrini istifadə etməkdən çəkindirmək lazımdır”.

Bütün bunlarla bağlı təmsil etdiyi qurumun mütəmadi monitorinq və reydlər apardığını deyən M.Piriyev insanların təhlükəsizliyi üçün maarifləndirmə işinin vacib olduğunu gizlətmir. Sektor müdiri istirahət obyektlərinə sözügedən məsələ ilə bağlı tövsiyələr verildiyini, lakin hələ ki qaydaları pozanlara qarşı cəzaların tətbiq olunmadığnı vurğulayıb: “Dənizin kənarında xeyli lövhələr quraşdırmışıq. Həmin lövhələrdə skuterlərlə dənizə daxil olanlara xəbərdarlıq, onların təhlükəsizliyə əməl etmələri ilə bağlı informasiyalar qeyd olunub. Cərimələrə gəlincə, bununla məşğul olan aidiyyəti qurumlar var. Konkret olaraq cəzalar tətbiq etmirik. Amma gələcəkdə belə hallar baş verərsə, obyektlərə müəyyən cərimələr tətbiq oluna bilər. Bununla bağlı aidiyyəti qurumlara təkliflər verilib”.

Qeyd edək ki, iyulun 31-də Novxanı çimərliyində tanınmış müğənni Tacir Şahmalıoğlunun 36 yaşlı qardaşı Mahir Allahverdiyev skuterlə çimərlikdə hərəkətdə olarkən suda batdığından bu mövzu yenidən gündəmə gəlib. Xilasedicilərin axtarışlarına baxmayaraq, onun cəsədini tapmaq hələ mümkün olmayıb.

pia.az