“Azərbaycanın tarixi şəxsiyyətləri və dövlət xadimləri haqqında neqativ fikirlər söylənilməsinin əleyhinəyəm”
Bunu Azərbaycan Demokratik Maarifçilik Partiyasının (ADMP) sədri, millət vəkili Elşən Musayev deputat həmkarı Naqif Həmzəyevin Məhəmməd Əmin Rəsulzadə haqqında söylədiyi fikirləri Publika.az-a şərh edərkən deyib.
E.Musayev deyib ki, Azərbaycan dövlətinin formalaşmasında Məhəmməd Əmin Rəsulzadədən gələn bir yol var. Bu yol uzun vaxt keçəndən sonra Əbülfəz Elçibəylə müstəqilliyə qədəm qoyub.
“Mən yalnız bu fikirlə tam razıyam ki, müasir Azərbaycan dövləti ulu öndər Heydər Əliyevin əsəridir. Bununla belə mən keçmişə daha loyal baxmağın tərəfdarıyam. Yəni biz Heydər Əliyevin adını qorumaqla tarixi keçmişimizdə olan yaxşı hadisələri və şəxsiyyətləri də hörmətlə yad etməliyik”.
Xatırladaq ki, Naqif Həmzəyev "Yeni Müsavat"a verdiyi müsahibəsində Məhəmməd Əmin Rəsulzadəni “vətən xaini” adlandıraraq onun büstünün Gəncədə deyil, ilk respublikanı Tiflisdə qurduğu üçün məhz orada qoyulmasını təklif edib.
pia.az