Müdafiə Nazirliyinin sabiq mətbuat katibi Eldar Sabiroğlu keçmiş nazir Səfər Əbiyev və onun həbs olunmuş müavini, polkovnik Mehman Səlimov barəsində yayılan xəbərlərə münasibət bildirib
E. Sabiroğlu azvision.az-a açıqlamasında bildirib ki, polkovnikin həbs xəbəri ilə bağlı artıq məlumatlıdır:
“Onun həbs olunması barəsində mətbuatdan xəbər tutmuşam. Bu barədə heç nə deyə bilmərəm”.
Daha sonra E. Sabiroğlu sabiq nazir Səfər Əbiyevlə əlaqəsindən söz açıb: “Hazırda rayondayam. Səfər Əbiyevlə bir ilə yaxındır ki, əlaqə saxlamıram. Əvvələr bir dəfə danışmışdıq. O zaman hal-əhvalını soruşmuşdum. İndi onun barəsində heç nə bilmirəm. O da əlaqə saxlamır”.
Qeyd edək ki, Baş Prokurorluğun Ağır Cinayətlərə Dair İşlər üzrə İstintaq İdarəsində istintaq edilən cinayət işi üzrə 1955-ci il təvəllüdlü Səlimov Mehman Əmirxan oğlu Cinayət Məcəlləsinin 179.3.2-ci (mənimsəmə - külli miqdarda törədildikdə) və 308.2-ci (vəzifə səlahiyyətlərindən sui-istifadə etmə) maddələri ilə təqsirləndirilən şəxs qismində cəlb edilməklə, barəsində məhkəmənin qərarı ilə həbs qətimkan tədbiri seçilib. M. Səlimov 1995-99-cu illərdə Azərbaycan müdafiə nazirinin siyasi və ictimai işlər üzrə müavini olub.
Bu gün isə sıra mətbuat orqanlarında yayılan xəbərlərdə sabiq nazir S. Əbiyev barəsində də araşdırma aparılıdığı qeyd olunub.
pia.az
Digərxəbərlər
Populyar xəbərlər
