Ermənistanın “Lavrov planı”ndan imtinası Rusiyanın imitasiyasıdır?- Politoloq rəyi

Azər Qasımlı: “İctimaiyyətə təqdim etmək istəyirlər ki, guya Rusiya Azərbaycanın maraqlarını müdafiə edir və buna görə də Ermənistana təzyiq edir. Mən hesab edirəm ki, bu sadəcə ictimai fikrə oynanılan oyundur”.

“Azərbaycan hansısa referendumun keçirilməsi və sülhməramlı qüvvələrin yerləşdilməsindən daha çox, Ermənistan kimi status kvonun qalmasında maraqlıdır”.

Bu fikirləri PİA.AZ-a REAL İdarə Heyətinin üzvü, politoloq Azər Qasımlı Lavrovun Ermənistan görüşündən sonra cəbhədə yaranan gərginliyi şərh edərkən qeyd edib.

Rusiya Xarici işlər naziri Sergey Lavrovun Ermənistana səfərindən sonra cəbhə bölgəsində gərginlik yenidən hiss olunmağa başladı. Hazırda yaşanan gərginlik Ermənistanın “Lavrov planı”nından tamamilə imtina etmə ehtimalını ortaya qoyurmu və bu Rusiyanın imitasiası ola bilərmi?

PİA.AZ-ın əməkdaşı bu mövzunu siyasi şərhçi Azər Qasımlı ilə müzakirə edib. Politoloqun fikrincə tərəflər arasında heç bir problem yoxdur və məsələ Rusiya tərəfindən imitasiya edilib.

Azər Qasımlı: “İndiki şərtlər altında ən danışıqların effektivliyinə və tərəflərin səmimi şəkildə nəyisə həll edəcəklərinə inanmıram”.

“Üzdə görünən odur ki, Ermənistan rəhbərliyi ilə Rusiya hökuməti arasında problem var. Rusiya və Ermənistan mediası, politoluqları göstərməyə çalışırlar ki, guya bu problem Rusiya sülhməramlı qüvvələrinin Qarabağda yerləşdirilməsi ilə bağlıdır. Birdə Sarkisyanın açıq şəkildə deməsi ki, Qarabağ ermənilərinə təminat verilmədən Azərbaycana Qarabağdan xaric 5-6 rayonun qaytarılmasından söhbət gedə bilməz. Onu göstərmək istəyirlər ki, guya onların arasında bu tipli problemlər var. Amma mən hesab edirəm ki, aralarında heç bir problem yoxdur və onlar məsələni imitasiya edirlər. Təəssüf ki, Azərbaycan hökuməti də bunda iştirak edir. Rusiya da öz növbəsində istəyir ki, oraya sülhməramlı kontingenti yerləşdirsin. Rusiya üçün Qarabağın müstəqil olub-olmaması məsələsinin önəmi yoxdur. Onun üçün vacib olan 2 məsələ var:

1. Bu ərazidə dağlıq Qarabağ problemi həmişə qalsın.

2. Rusiyanın sözdə sülhməramlı qüvvələri münaqişə zonasında yerləşdirilsin.

Ermənistan da özünü elə göstərir ki, guya sülhməramlı rus kontingentinin orada yerləşdirilməsini istəmir. İctimaiyyətdə belə fikir formalaşdırmaq istəyirlər ki, guya Rusiya Azərbaycanın maraqlarını müdafiə edir və buna görə də Ermənistana təzyiq edir. Mən hesab edirəm ki, bu sadəcə oynanılan oyundur. Danışıqlar prosesinə və hansısa qərarın qəbul ediləcəyinə inanmıram. Düşünürəm ki, bu sadəcə imitasiyadır.

Hesab edirəm ki, Azərbaycan hökuməti də bu məsələ aktual olsunmalııdır və məsələnin gərginliyini hər zaman gündəmdə saxlamalıdır. Amma görünən odur ki, Azərbaycan hansısa referendumun keçirilməsi və sülhməramlı qüvvələrin yerləşdilməsindən daha çox, Ermənistan kimi status klonun qalmasında maraqlıdır . Ona görə də indiki şərtlər altında ən danışıqların effektivliyinə və tərəflərin səmimi şəkildə nəyisə həll edəcəklərinə inanmıram”.

Sübü ƏZİZOVA

pia.az