Masazır qəsəbəsində yerləşən binaların birində krandan mavi rəngli su gəlir. Suyun qoxusu olmasa da, rəngi sakinləri qorxuya salıb. Belə su təxminən bir saata yaxın kranlardan axıb
PİA.AZ xəbər verir ki, Day.Az-a məktub yazan sakinlər deyirlər ki, belə kommunal möcüzə ilə ilk dəfə deyil ki, rastlaşırlar. Bir neçə il əvvəl şəhərin başqa yerində yaşayanda da belə problemlə rastlaşıblar.
Məsələyə aydınlıq gətirmək üçün saytın əməkdaşı "Azərsu" ASC ilə əlaqə saxlayıb. Qurumun mətbuat katibi Anar Cəbrayıllı bildirib ki, sakinlər tərəfindən belə müraciətlər daxil olub. Belə bir hal Yasamal rayonunda da müşahidə olunub.
"Bizim bu məsələyə aidiyyatımız yoxdur. Bizim verdiyimz su heç vaxt rəngini dəyişə bilməz. Elə hal olub ki, zəng edib deyiblər ki, mənzildə qırmızı su gəlir. Sonradan məlum olub ki, həmin su yalnız bir mənzildə gəlir. Bunun əsas səbəbi məişətdə istifadə olunan kimyəvi maddələrdir. Əgər krandan rəngli su gəlirsə, deməli, mənzildaxili kommunikasiyalar düzgün qoşulmayıb. Misal üçün, paltaryuyan maşının suyu gələn suya qoşula bilər. Bu problemi ya özlərində, ya da qonşularında axtarsınlar", - o əlavə edib.