Milli Məclisdə eynəklər və linzalarla bağlı qanun layihəsi hazırlanıb
Bu barədə virtualaz.org saytına açıqlamasında Milli Məclisin Sosial Siyasət Komitəsinin sədri Hadı Rəcəbli məlumat verib.
H.Rəcəbli bildirdi ki, Azərbaycan cəmiyyətində əhalinin yarısının bu və ya digər qismdə gözlüklərə ehtiyacı var və bu insanların yarısı eynək taxır.
Komitə sədrinin sözlərinə görə, eynəkdən istifadə edən xeyli sayda insan onlara fayda verəcək gözlük və linzalar ala bilmir: “Bu gün gözlüklər üçün istehsal olunan şüşələrin, satılan linzaların hazırlanması prosesinin ciddi şəkildə tənzimlənməsinə ehtiyac var. Praktika göstərir ki, insanlar üçün yazılan gözlük və linzaların əksəriyyətinin heç bir faydası yoxdur. Bunlar insanın görmə problemini aradan qaldırmamaqla yanaşı çox ciddi problemlərin, fəsadların yaranmasına səbəb olur”.
H.Rəcəblinin fikrincə, yaranan problemlərin aradan qaldırılması məqsədilə eynəklər üçün hazırlanan şüşələrin, linzaların satışı və istehsalı mütləq şəkildə tənzimlənməlidir.
Bu barədə ilk dəfə olaraq qanun layihəsi üzərində işlədiklərini deyən H.Rəcəbli layihənin hazırlanmasında dünya təcrübəsindən də faydalandıqlarını söylədi.
Layihənin adının “Gözə aid optik cihazlarla bağlı qanun” ola biləcəyini bildirən komitə sədri Milli Məclisin pleniar iclasında bu məsələni gündəmə çıxaracaqlarını da sözlərinə əlavə etdi.
Digərxəbərlər
Populyar xəbərlər
