Dünən İstanbulun Atatürk hava limanında törədilən və 40-a yaxın insanın ölümünə, 140-dan artıq adamın yaralanmasına səbəb olan terror aktı Türkiyədə hava limanında törədilən ilk hadisə deyil. 1982-ci ildə Anakaradakı "Esenboğa" hava limanında da nənzər hadisə törədilib
Politoloq Şahin Cəfərli sosial şəbəkədəki səhifəsində bu baradə yazıb və həmin terror aktını ermənilərin ASALA terror təşkilatının iki üzvünün törətdiyini qeyd edib.
Ş.Cəfərlinin statusunu oxucuların diqqətinə çatdırırıq:
"Hadisə 1982-ci il avqustun 7-də baş verib. Levon Ekmekçiyan və Zöhrab Sarkisyan adlı ASALA terrorçuları Ankara "Esenboğa" hava limanında partlayış törədərək insanlara atəş açmağa başlayıblar. Nəticədə 9 nəfər (biri alman, biri amerikalı) ölüb, 72 nəfər yaralanıb. Polis hadisə yerində Z.Sarkisyanı öldürüb, yaralanan L.Ekmekçiyan isə sağ ələ keçirilib.
Ekmekçiyan törətdiyi əməldən peşman olduğunu bildirsə də, 1982-ci il sentyabrın 7-də məhkəmənin hökmü ilə edama məhkum edilib və hökm 1983-cü il yanvarın 28-də icra olunub. Ankarada dəfn olunan Ekmekçiyanın nəşi 2013-cü ildə qardaşı tərəfindən Fransaya aparılıb.
pia.az