Azərbaycanın Qərb regionunda ilk Uşaq Forumu Gənclər üçün Təhsil Mərkəzi - Gəncə Regional ofisi və “Pendik” Elitar Uşaq İnkişaf Mərkəzinin birgə təşəbbüsü, Gəncə şəhər İcra Hakimiyyətinin dəstəyi ilə təşkil olunub
PİA.AZ xəbər verir ki, tədbirə uşaq baxçaları, uşaq evlərinin kollektivləri və digər istedadlı uşaqlar qatılıb.
Gənclər üçün Təhsil Mərkəzi - Gəncə Regional ofisinin rəhbəri Aygün Həsənzadə və Gəncə şəhər İcra Hakimiyyətinin nümayəndəsi Kənan Məmmədov çıxışında bildirib ki, forumun təşkil olunmasında məqsəd Azərbaycanda sağlam, təhsilli, hərtərəfli inkişaf edən uşaqların böyüməsinə dəstək olmaqdır.
Uşaq hüquqlarının müdafiəsi,onlara nəzarət və diqqətin artrılması, uşaqlar arasında maarifləndirmə işləri aparmaq, uşaqlarda maraqlı məqamları müzakirə etmək qabiliyyətini formalaşdırmaq və istedadlı uşaqların tanınmasına şərait yaratmaq da forumun məqsədlərinə daxildir.
Tədbir çərçivəsində uşaqlar arasında şahmat yarışı keçirilib. Uşaqlar şer söyləyib, rəngarəng rəqs nömrələri nümayiş etdiriblər. Klounların çıxışları tədbir iştirakçılarında xoş əhval-ruhiyyə yaradıb.