PİA.AZ sevilən şair Baba Vəziroğlunun "Hava haqqında" şeirini oxucularına təqdim edir
Havadan danışır bir gözəl xanım.
“Yağış yağacaqdır, qar yağacaqdır.
Gah günəş çıxacaq, gah ay doğacaq,
Havalar tutulub-açılacaqdır”.
Mənim günəşim də, ayım da sənsən,
Onu sinoptiklər nə bilir axı.
Sən bir az qiyqacı baxanda mənə,
Mənim gözlərimdə ildirım çaxır.
Bir güllü-çiçəkli bahar günündə,
Soyuq baxışinla qış gəlir sənin.
Mənim taleyimə yağışlar yağır
Elə ki gözünə yaş gəlir sənin.
Söz var- dolu kimi yağır başıma,
Söz var- duman olub yolumu kəsir.
Məndən inciyəndə, məndən küsəndə,
Şimaldan buz kimi küləklər əsir.
Səni gözləyirəm, hələ bilmirəm
Yağış yağacaqmı, qar yağacaqmı?
Mənim bu eşqimin səmalarında,
Havalar tutulub-açılacaqmı?
Havadan danışır bir gözəl xanım,
Hardasa qar tökür, ya yağış yağır.
Hardasa ay batır, ya günəş qalxır,
Mənim günəşim də, ayım da sənsən,
Onu sinoptiklər nə bilir axı?!
Gülyanaq İsmayılqızı
pia.az