Paytaxtın Sabunçu rayonunda köhnə "Razin stansiyası” adlanan ərazi şumlanaraq yerlə-yeksan olunub
Adil Vəliyev rayona icra başçısı gələr-gəlməz ilk işlərindən biri də bu köhnə stansiyanı buldozerin qabağına vermək olub.
BakiPost.az xəbər verir ki, icra başçısının bu addımına səbəb ərazinin tör-töküntü, antisanitariya, zibillik, xırda ticarət köşkləri ilə əhatələnməsi olub: kimisi peraşki-qutab satırdı, kimisi siqaret, kimisi də çayxana işlədirdi.
Burada ət satandan süd satana qədər də görmək olardı. Avtobusların dayanacağına çevrilmiş stansiya qarşısında indi də sərnişinlər dayanır.
Necə ki, oxşar mənzərə Sabunçu vağzalında hökm sürür. Lakin rayonun icra başçısı vağzalın ətrafına əl gəzdirib səliqə-sahmana salmaq istəmir.
Hətta bu il qışda yağan yağışda okeana çevrilmiş vağzaldan çəkilmiş görüntülər sosial şəbəkələri və medianı "bəzəyirdi”.
Sabunçu sakinləri isə vağzaldan öncə "Razin” stansiyasında abadlıq işlərinin görüləcəyini gözləyirdi.
BakiPost.az-a daxil olan məlumata görə, stansiyanın yanındakı ərazi parka çevrilsə də, stansiya üçün nəzərdə tutulan ərazi satılıb.
Hazırda həmin massivdə supermarket və özəl tibb klinikası tikilməkdədir. Parkın içini iş adamına satan icra başçısı boş yer saxlamayıb, parkın içində də kafe inşa olunur.
Xatırladaq ki, bir müddət əvvəl Sabunçu Rayon İcra Hakimiyyətinin təsərrüfat şöbəsindən milli.az-a bildirilmişdi ki, həmin ərazi sökülərək genişləndirilir.
Söküntü işləri başa çatandan sonra ərazidə park salınacaq. Bundan başqa həmin ərazidə tikilməsi nəzərdə tutulan metronun "Bakıxanov stansiyası” üçün torpaq sahəsi ayrılır.
Bakı Metropoliteninin mətbuat xidmətinin o zamankı rəhbəri Nəzakət Tanrıverdiyeva demişdi ki, "Bakıxanov” stansiyasının tikintisi gələcək üçün nəzərdə tutulub. Bakıxanov qəsəbəsində stansiya üçün torpaq sahəsi ayrıla bilər, ancaq tikinti işlərinə başlanmayıb.
Ancaq hər iki qurum rəsmisinin dedikləri özünü doğrultmadı. Burada nə metro sahəsi üçün yer qalıb, nə də park tikintisi üçün genişlik. Ərazi sahibkarlara satılıb...
pia.az
Fotolar
Digərxəbərlər
Populyar xəbərlər
