İctimai Komitənin səlahiyyətləri genişləndirildi

Ədliyyə Nazirliyi yanında Penitensiar Xidmətə Nəzarət üzrə İctimai Komitənin səlahiyyətləri genişləndirilib

Bu barədə Trend-ə İctimai Komitənin üzvü Sahib Məmmədov məlumat verib.

Onun sözlərinə görə, komitənin növbəti iclasında ədliyyə naziri Fikrət Məmmədov bildirib ki, İctimai Komitənin fəaliyyəti ilə bağlı qaydalara dəyişiklik edilib, qurumun əsasnaməsi “İctimai iştirakçılıq haqqında” qanuna uyğunlaşdırılıb.

Bu dəyişikliyə əsasən, Komitə üzvlərinin səlahiyyət müddəti daha bir il artırılaraq iki il olub.

İclasda dəyişikliklər barədə məlumat verən F.Məmmədov nəzərə çatdırıb ki, bundan sonra İctimai Komitə Ədliyyə Nazirliyinin bütün fəaliyyət sahələrində ictimai nəzarəti həyata keçirə biləcək. Eləcə də nazirliyə aid məsələlərdə qərar qəbuletmə prosesində iştirak etmək səlahiyyətlərinə malik olacaq. Bu, artıq normativ sənədlə tənzimlənəcək.

İclasda həmçinin İctimai Komitənin bütün üzvlərinə vəsiqələr təqdim olunub. Bu vəsiqələrlə komitə üzvləri cəzaçəkmə müəssisələrinə maneəsiz baş çəkə biləcəklər.

S.Məmmədov bildirib ki, iclasda cəza sistemindəki vəziyyətin yaxşılaşdırılması, yeni tikilən cəzaçəkmə müəssisələrində əlilliyi olan şəxslərə müvafiq infrastrukturların yaradılması, məqsədli dezinformasiyaların yayılmasının qarşısının alınması və s. məsələlərlə bağlı müzakirələr aparılıb, "Cəzaçəkmə sistemində ictimai nəzarətin Azərbaycan modeli" adlı beynəlxalq konfransın keçirilməsi təklif olunub və bu təklif müsbət qarşılanıb.