Milli Şura qiymət artımına etiraz olaraq dekabrın 15-də icazəli mitinq keçirdi
Öncədən iki saat davam etməsi planlaşdırılan, amma cəmi bir saat çəkən mitinqdə AXCP sədri Əli Kərimli, Milli Şuranın sədri Cəmil Həsənli, Müsavat Partiyası Mərkəzi İcra Aparatının rəhbəri Arif Hacılı və KXCP sədri Mirmahmud Mirəlioğlu çıxış etdilər.
Halbuki təşkilatçılar aksiya öncəsi deyirdilər ki, bu mitinq benzinin bahalaşmasına etiraz əlaməti kimi keşirildiyindən orada çıxışçılar arasında iqtisadçılaq və ekspertlər də olacaq. Amma mitinq vaxtından əvvəl başa çatsa və digər natiqlərin də danışmasına fiziki baxımdan yetərincə imkan, vaxt olsa da bu çıxışları görmədik. Milli Şuranın tədbirində heç bir iqtisadçı çıxış edib bahalaşmaya ciddi, tutarlı arqumentlərlə etirazını bildirmədi.
Görəsən, niyə?
Virtualaz.org saytının əməkdaşı bu suala cavab almaq üçün mitinqin əsas təşkilatçılarında olan AXCP-nin mövqeyini öyrənib. Partiyanın sədr müavini Fuad Qəhrəmanlı virtualaz.org-a açıqlamasında bildirdi ki, çıxışçılar Mitinq Komitəsi tərəfindən nəzərdə tutlmuşdu:
“Mitinqdə kimlərin çıxış edəcəyi qurumun Mitinq Komitəsi tərəfindən müəyyənləşdirilmişdi. Buna görə də ekspertlərin çıxış etməməsinin başqa səbəbi ola bilməz”.
Arif Hacılının mitinqdə iqtisadçı-ekspertlərin çıxış edəcəyi ilə bağlı əvvəlcədən açıqlama verməsinə də münasibət bildirən F.Qəhrəmanlı bu qərarı A.Hacılının vermədiyini qeyd etdi: “Bu qərar Arif Hacılı tərəfindən verilmir. Kimlərin çıxışı nəzərdə tutulmuşdusa, onlar da çıxış etdi”.
AXCP rəsmisinin deməyindən belə nəticə hasil olur ki, iqtisadçıların çıxış etməyəcəyi öncədən bəlli imiş. Bəs onda “mitinqdə xeyli nüfuzlu şəxsin iştirakı, iqtisadçıların çıxışı gözlənilir” anonsu nə idi? Yoxsa meydana daha çox adam yığmaq üçün düşünülmüş adi reklam tryuku? Hər halda sual açıq qalır...