Müsavat Partiyasının başqanı İsa Qəmbər bu gün Ukraynadan Azərbaycana qayıdıb
Bu barədə məlumatı musavat.com-a partiya başqanının oğlu İlkin Qəmbər verib.
Müsavat lideri Kiyevə dekabrın 14-də, Avromaydan hərəkatçılarına Azərbaycanın demokratik ictimaiyyəti adından həmrəylik nümayiş etdirmək üçün getmişdi.
Dünən Kiyevdəki Müstəqillik Meydanında yüz minlərlə nümayişçinin qarşısında etdiyi çıxışında İsa Qəmbər bir daha Azərbaycan xalqının, ölkənin demokratik düşərgəsinin öz haqqı uğrunda mübarizəyə qalxan dost Ukrayna xalqının yanında olduğunu bəyan edib. Onun çıxışı canlı olaraq əksər yerli telekanallar tərəfindən yayımlanıb, maraq və coşqu ilə qarşılanıb.
Müsavat başqanı səfər çərçivəsində həmçinin, onunla eyni gündə Kiyevdə olan nüfuzlu amerikalı senator Con Makkeynlə, Ukrayna siyasi müxalifətinin bir sıra ünlü şəxsləri ilə görüşlər keçirib.
İsa Qəmbəri səfərdə onu müavini Gülağa Aslanlı müşayiət edib.