“Övladım Uğura doğum haqqında şəhadətnamə almaqla yanaşı, ona şəxsiyyət vəsiqəsi də düzəltdirmişəm
Sənədlərin düzəlməsində problem yaşamadım. Sağ olsunlar, Şəmkirdə hara müraciət etdimsə, bütün işlərimi yoluna qoydular.
Uşağımın şəhadətnaməsində ata adı yerində Vüqar Əliyevin adı qeyd olunub. Başqa kim olmalı idi?!”
PİA.AZ xəbər verir ki, bu sözləri Modern.az-a həbsdə ana olması ilə gündəmə gələrək azadlığa çıxan keçmiş məhkum Lamiyə Quliyeva deyib. Onun sözlərinə görə, Uğurun ata tərəfindən heç kim onu görməyə gəlməyib:
“Onlarla heç bir əlaqəm yoxdur, mənə lazım da deyillər. O qədər atasız böyüyən uşaqlar var ki... Özüm atasız böyümüşəm. Təki ana yaxşı olsun övlada qarşı. İnsan atadan yox, anadan yetim qalır. Mən belə şeyləri çox görmüşəm, İnşaallah, Uğura atasızlığı hiss etdirmərəm”.
Lamiyə Quliyeva və keçmiş nişanlısı Vüqar Əliyev 2003-cü ilin mayında Şəmkir rayonunun sabiq icra başçısı Aslan Aslanovun oğlu Ruslanı qətlə yetirməkdə təqsirləndiriliblər.
Hazırda Vüqar Əliyev Qobustan həbsxanasında cəza çəkir. Maraqlıdır ki, Lamiyənin övladının onun keçmiş nişanlısı vüqar Əliyevə heç bir aidiyyəti yoxdur. Lamiyə özü açıqlamasında süni mayalanma ilə uşaq dünyaya gətirdiyini və övladının atasının məhkum Elnur Rəsulov olduğunu açıqlamışdı.
İndi isə E.Rəsulov yaddan çıxıb, keçmiş nişanlısı Vüqar Əliyevin övladının atası olaraq göstərib. V.Əliyev ömürlük məhkum kimi Qobustan qapalı həbsxanasında başqa bir qadınla ailə də qurub və vəkili vasitəsilə Lamiyədən imtina etdiyini açıqlamışdı.
pia.az