Müsavat Anar Məmmədlinin həbsinə sərt reaksiya verdi

Xəbər verdiyimiz kimi, Seçkilərin Monitorinqi və Demokratiyanın Tədrisi Mərkəzinin (SMDTM) rəhbəri Anar Məmmədli barəsində 3 ay müddətinə həbs-qətimkan tədbiri seçilib

Bu barədə qərar Nəsimi rayon Məhkəməsində verilib. Məhkəmədən verilən məlumata görə, A. Məmmədli Cinayət Məcəlləsinin 192.2.2- ci maddəsi ilə (qanunsuz sahibkarlıq fəaliyyəti) ilə ittiham olunur.

Müsavat başqanının birinci müavi Arif Hacılı "Deyerler.org"a açıqlamasında deyib ki, hakimiyyət bununla nə Azərbaycan cəmiyyəti, nə də Beynəlxalq Birliyin rəyləri ilə hesablaşmadığını nümayiş etdirir.

"Anar Məmmədlinin həbsi Azərbaycan hakimiyyətinin cəmiyyəti tamamilə susdurmaq, vətəndaş cəmiyyətinin qurulmasına imkan verməmək siyasətinin davamıdır. Beynəlxalq birlik tərəfindən Azərbaycanda siyasi məhbus probleminin həll olunması tələblərinin artdığı bir məqamda siyasi motivli həbslərin davam etdirilməsi cəmiyyətdə qorxu mühitinin saxlanmasına xidmət edir.

Hakimiyyət bununla nə Azərbaycan cəmiyyəti, nə də Beynəlxalq Birliyin rəyləri ilə hesablaşmadığını nümayiş etdirir. Belə siyasət Azərbaycanın avtoritar bir ölkə kimi imicinin möhkəmlənməsi, ölkəmizin bir çox pozitiv proseslərdən daha da təcrid olunması ilə nəticələnəcək", -deyə Arif Hacılı bildirib.