Müsavat Partiyası gənc müsavatçının saxlanılmasına etiraz olaraq bəyanat qəbul edib. Partiyanın mətbuat xidmətindən daxil olan bəyanat mətnində bildirilir:
"Müsavat Partiyası Laçın rayon təşkilatının təsisçilərindən biri, 12 il bu təşkilatın sədri olan Raqif Kərimlinin oğlu müsavatçı gənclər təşkilatının MTK-nın sədri blogger, musavat.org.az saytının adminstiratoru Fərəc Kərimov 23 iyul 2014-cü il tarixində Bakı sağlamlıq mərkəzinin reanimasiya şöbəsinin qabağından mülki geyimli şəxslər tərəfindən heç bir sənəd təqdim edilmədən, ona hüquq və vəzifələri elan edilmədən faktiki olaraq oğurlanaraq, iradəsi əleyhinə məcburən qeyri-müəyyən istiqamətdə aparılıb.
Hakim rejim Fərəc Kərimovu siyasi və blogger fəaliyyətinə görə həbs etdiyini gizlədə bilməyəcək. Bir neçə gün bundan qabaq onun siyasi fəaliyyətlə məşğul olmayan böyük qardaşı Sirac Kərimli küçədə saxlanılaraq, üzərindən əməliyyatçılar tərəfindən guya narkotik maddənin tapılması, evində axtarış aparılarkən ilk olaraq Fərəcə məxsus notebookun axtarılması və götürülməsi, bu həbsin Fərəc üçün planlaşdırıldığını ifşa edirdi.
Müsavat Partiyası siyasi xarakter daşıyan bu həbslərin Müsavat Partiyasına qarşı, azad düşüncəli gənclərə qarşı, sosial şəbəkələrin fəal iştirakçılarına qarşı - bütövlükdə Azərbaycan demokratik qüvvələrinə qarşı repressiyaların davamı olduğunu bəyan edir.
Raqif Kərimlinin ailə üzvlərinə qarşı həyata keçirilən bu həbslər, iki azyaşlı uşaq atası, heç bir siyasi mənsubiyyəti olmayan Sirac Kərimlinin şərlənərək həbs edilməsindən sonra insult əlamətləri olan anasını təcili yardım maşını ilə Bakı sağlamlıq mərkəzinə müayinədən keçirmək üçün aparan qardaşı Fərəc Kərimovun da saxlanılması eyni zamanda konkret bir ailəyə qarşı qəddarlığın təzahürüdür.
Beynəlxalq təşkilatlar qarşısında siyasi məhbusların olmadığını iddia edən Azərbaycan hakimiyyəti ölkədə fəaliyyət göstərən bloggerləri, siyasi fəalları, QHT nümayəndələrini həbs etməklə faktiki olaraq siyasi məhbuslar siyahısını günü-gündən genişləndirir.
Azərbaycan hakimiyyətinin bu repressiv addımları haqq və ədalət ugrunda mübarizə aparan müasir gəncliyin mübarizə ruhunu qıra bilməyəcəkdir. Gənclərlə mübarizə aparan rejimlərin süquta məhkum olması tarixin qanunauyğunluğudur.
Müsavat Partiyası qanunsuz və əsassız olaraq həbs edilmiş Sirac Kərimlinin və Fərəc Kərimovun qeyri-şərtsiz olaraq dərhal həbsdən azad edilməsini tələb edir".
Digərxəbərlər
Populyar xəbərlər
