"Azərbaycan parlamentində real müxalifət partiyaları yoxdur. Yalnız Ədalət Partiyası müstəqilliyini qoruyub saxlaya bilib. Digərləri hakimiyyət tərəfindən yaradılıb".
Bu sözləri açıqlamasında çıqlamasında Vətəndaş və İnkişaf Partiyasının (VİP) sədri Əli Əliyev deyib. Onun sözlərinə görə, hakimiyyət real müxalifət partiyaları ilə əməkdaşlığa üstünlük verməlidir:"
YAP-da partiyalararası əlaqələr, dialoq komissiyasının iclasına yalnız parlamentdəki partiyalar dəvət olunub. Bizim partiyaya dəvət gəlməyib. Biz bu formatda keçirilən dialoqu real duruma uyğun hesab etmirik. Axı Azərbaycan müxalifəti yalnız parlamentdəki partiyalardan ibarət deyil. Ölkənin siyasi sistemində mühüm yer tutan müxalifət partiyalarına qarşı ciddi münasibət olmalıdır. Ukraynada hakimiyyət devriləndən sonra ölkənin siyasi həyatı real müxalifət partiyalarından asılı qaldı. Demək istəyirəm ki, hakimiyyətlər istəsələr də belə real müxalifət partiyalarını siyasi səhnədən silə bilməzlər".
Parlamentdə təmsil olunan Bütöv Azərbaycan Xalq Cəbhəsi Partiyasının (BAXCP) katibi Elçin Mirzəbəyli VİP sədrinin fikirlərini bölüşmür. O, Ə.Əliyevin fikirlərinə münasibət olaraq Teleqraf.com-a bildirib ki, VİP sədri ölkədəki siyasi reallığı düzgün qiymətləndirə bilmir: "Mən parlamentdə təmsil olunan digər partiyaların adından danışa bilmərəm. Amma BAXCP-nin real siyasi güc, kifayət qədər potensiala malik, təşkilatlanmış güc mərkəzi olması faktdır. Əli Əliyevin rəhbəri olduğu partiyada isə sadaladığım faktorlar yoxdur. Digər tərəfdən, düşünürəm ki, onun YAP-ın məlum tədbirinə münasibəti qısqanclıqdan irəli gəlir və tələsik verilmiş açıqlamadır. Yaxşı olardı ki, o, komissiyanın ilk iclasının qərarını oxusun. Orada parlamentdə təmsil olunan və olunmayan partiyalarla əməkdaşlıq məsələsi öz əksini tapıb. İlk iclas sadəcə məsləhətləşmə xarakteri daşıyırdı və orada gələcək fəaliyyətin konturları müzakirə olundu".