Akif Nağı: “Azərbaycandan Ermənistana, Ermənistandan Azərbaycana səfərlərin təşkil olunması, hüquq müdafiəçilərinin birgə mövqe açıqlaması erməni mərkəzlərindən idarə olunan prosesinin tərkib hissəsidir”
“Əgər hər hansısa bir addım atılacaqsa, Qarabağ Azadlıq Təşkilatı (QAT) bu prosesləri dağıtmaq üçün bütün imkanlardan istifadə edəcək”.
Bu sözləri Qarabağ Azadlıq Təşkilatının (QAT) sədri Akif Nağı Azərbaycan və Ermənistan hüquq müdafiəçilərinin hər iki ölkənin prezidentlərinə və xalqlarına etdikləri müraciətə münasibət bildirərkən PİA.AZ-a açıqlamasında qeyd edib.
Xatırladaq ki, dünən Azərbaycan və Ermənistan hüquq müdafiəçiləri hər iki ölkənin prezidentlərinə və xalqlarına müraciət qəbul edib. Müraciətdə Erməni və Azərbaycan xalqlarının bu münaqişədən çoxdan yorulduğu və yeni itkilər istəmədəkləri qeyd olunub və münaqişənin həlli üçün atılması lazımlı olan addımların siyahısı da təqdim edilib.
Müraciəti Ermənistan tərəfdən Vahe Avetyan (hüquq müdafiəçisi), Vaan Martirosyan (“Milli Azadlıq Hərəkatı” ictimai təşkilatının sədri), Syuzan Caqinyan (“Meridian” hüquq-müdafiə təşkilatının sədr müavini, jurnalist), Azərbaycan tərəfdən isə Rövşən Rzayev (“Dağlıq Qarabağın Azərbaycan İcması” İctimai Birliyinin Şura üzvü), Kamil Səlimov (Bakı Dövlət Universitetinin professoru), Şəlalə Həsənova (“İctimaiyyətlə Əlaqələrin İnkişafın Dəstək” İctimai Birliyinin sədri) imzalayıb.
Təqdim olunan bu müraciətlə bağlı Qarabağ Azadlıq Təşkilatının (QAT) sədri Akif Nağı öz fikirlərini PİA.AZ-ın əməkdaşı ilə bölüşüb.
Akif Nağı: “Ermənilər bizə zərbə vurandan, insanlarımızı qətlə yetirəndən sonra dostluğa, qardaşlığa başlayıblar”.
Azərbaycan və Ermənistan hüquq müdafiəçilərinin birgə müraciətinin Ermənistanın oyunundan bir parça olduğunu vurğulayan Akif Nağıya görə, Azərbaycan tərəfi bu məsələdə düşünülmüş addım atmalıdır:
“Biz Qarabağ Azadlıq Təşkilatı olaraq hesab edirik ki, Azərbaycandan Ermənistana, Ermənistandan Azərbaycana səfərlərin təşkil olunması, hüquq müdafiəçilərinin birgə mövqe açıqlaması erməni mərkəzlərinin idarə olunan prosesinin tərkib hissəsidir. Burada məqsəd ermənilərin hansı ad altında olursa olsun Azərbaycan cəmiyyətinə nüfuz etməsindən ibarətdir. Onlar Azərbaycan cəmiyyətinə daxil olmaq və sonradan arxadan zərbə vurmaq istəyirlər. Ona görə də fikrimcə, bu məsələdə Azərbaycan tam ehtiyatlı olmalıdır. O prosesdə iştirak edən QHT nümayəndələri başa düşməlidirlər ki, ermənilər onları oyuna çəkirlər. Bu hal dəfələrlə, 1918-20-ci illərdə də olub. Ermənilər bizə zərbə vurandan, insanlarımızı qətlə yetirəndən sonra dostluğa, qardaşlığa başlayıblar və biz buna inandıqdan sonra yenidən arxadan zərbə vurublar.
Mən müraciətdə baxdım ki, onlar hətta münaqişənin Azərbaycanın ərazi bütövlüyü çərçivəsində həllinə tərəfdardırlar. Bu aldadıcı bir görünütüdür. Azərbaycan tərəfi buna aldanmamalıdır. Bu gün ermənilər xalq diplomatiyasını işə salmaq üçün nəyə desən qol çəkəcəklər.
Biz birmənalı şəkildə bu müraciətin əleyhinəyik. Əgər hər hansısa bir addım atılacaqsa, Qarabağ Azadlıq Təşkilatı (QAT) bu prosesləri dağıtmaq üçün bütün imkanlardan istifadə edəcək”.
Gülşən ŞƏRİF
pia.az