Rusiyanın Tomsk şəhərində yerləşən “Korporativ Təbabət Mərkəzi” Açıq Səhmdar Cəmiyyəti Bakıdakı “Səhhət” klinikası ilə birgə Azərbaycanda iki klinikanın açılmasına dair müqavilə bağlayıb
Virtualaz.org saytı “İnterfaks”a istinadən xəbər verir ki, bu barədə ASC rəsmiləri məlumat yayıblar.
“Layihənin ilkin dəyəri 2-2,5 milyon avrodur. Hazırda biz Bakı ərazisində müəssisənin yaradılması barədə müzakirələr aparırıq, perspektivdə isə Azərbaycanın şimalında kilinika açılacaq” - deyə şirkətin rəhbəri Sergey Antipov bildirib.
S.Antipovun sözlərinə görə, hazırda hər iki şirkət rus və Azərbaycan dillərində sənədlərin hazırlanması ilə məşğuldur. Növbəti mərhələdə əsas iş lisenziya almaqdır. Belə ki, “Korporativ Təbabət Mərkəzi” Azərbaycan ərazisində artıq bu il fəaliyyətə başlamağa hazırlaşır.
“Bizim top-menecment Azərbaycana getməyə hazırdır” - Antipov bildirib.
Qeyd edək ki, “Korporativ Təbabət Mərkəzi” tibbi istehsalat və əməyin mühafizəsi sahəsində fəaliyyət göstərən şirkətlərin birləşdiyi qrupdur. Ora “SibMedSentr”, “KrasMedSentr”, “TomMedSentr”, “SibProfStandart” və “Alfamed” şirkətləri daxildir.
“Səhhət” klinikası isə Azərbaycan-Almaniya birgə müəssisəsidir və özəl tibbi xidmətlə məşğul olur.