Qırğızıstan Ali Məhkəməsi sabiq prezident Kurmanbek Bakiyev barəsində qəbul olunan qiyabi hökmü yumşaldıb
Publika.az “RİA-Novosti” agentliyinə istinadən xəbər verir ki, məhkəmə ömürlük həbs cəzasını 30 il azadlıqdan məhrum edilmə cəzası ilə əvəz edib.
Bakiyev 2010-cu ilin aprelində Bişkekin mərkəzi meydanında mitinq iştirakçılarının kütləvi qətlinin (77 nəfər ölmüş, 300-dən çoxu yaralanmışdı) təşkilində ittiham olunaraq qiyabi ömürlük həbs cəzasına məhkum edilmişdi.
Qırğızıstanın Cinayət Məcəlləsinin 50-ci maddəsinə əsasən, ömürlük azadlıqdan məhrum edilən şəxslərin cəzası 30 ilə kimi azadlıqdan məhrum edilmə cəzası ilə əvəz oluna bilər.
Qeyd edək ki, 2005-2010-cu illərdə Qırğızıstan prezidenti olan Kurmanbek Bakiyev hakimiyyətdən devrildikdən sonra Belarus prezidenti Aleksandr Lukaşenko ona Minskdə sığınacaq verib. Rəsmi Bişkekin tələblərinə baxmayaraq, Minsk sabiq prezidenti təhvil verməkdən imtina edir. Bakiyev bir neçə il əvvəl Belarus vətəndaşlığını alıb.
pia.az