“Donbasda separatçılar sırasına qoşulan azərbaycanlılarla Suriya və İraqda yaşayan azərbaycanlılara heç bir fərq qoyulmamalıdır”
Axar.az xəbər verir ki, bu açıqlama ilə politoloq Elxan Şahinoğlu çıxış edib.
“Yaydığı görüntüdə Donbasda separatçıların arasında olan bir azərbaycanlı əlində silah Ukrayna prezidentini ölümlə hədələyirdi. Daha sonra onun özünü məhv etdilər. Dünən isə Rusiya telekanalı RTR belə bir xəbər yayıb ki, separatçıların sırasında fransızlar və ispanlarla yanaşı, azərbaycanlılar da savaşır.
Biz özümüz separatizmdən əziyyət çəkirik. Bu səbəbdən bütün digər münaqişələrdə ərazi bütövlüyü prinsipindən çıxış edirik. Ona görə də Azərbaycanın müvafiq təhlükəsizlik strukturları məsələyə münasibət bildirmədilər. Bəyanatda deyilməlidir ki, Donbasda separatçıların sıralarında savaşan azərbaycanlılara qarşı cinayət işi açılacaq. Bizim üçün Donbasda separatçılara qoşulan azərbaycanlılarla Suriya və İraqda savaşan azərbaycanlılar arasında heç bir fərq olmamalıdır.
Donbasda separatçıların sırasında Ukrayna ordusuna qarşı savaşan azərbaycanlılar bilməlidirlər ki, onlar Azərbaycan pasportuna malikdirlərsə, geri qayıtdıqda məsuliyyətə cəlb olunacaqlar. Bu məsələni görməzlikdən gəlsək, o zaman bəyənmədiyimiz ikili standarlardan çıxış etmiş olacağıq”.
pia.az