Həbsdə olan şair Saday Şəkərli barəsində olan hökmdən apellyasiya şikayəti verir
Lent.az-a bu barədə vəkil Bəhruz Bayramov məlumat verib.
O bildirib ki, artıq apellyasiya şikayətini hazırlayıb, sabah məhkəməyə təqdim edəcək. Vəkilin sözlərinə görə, onlar şikayətində Saday Şəkərli barəsində bəraət hökmünün çıxarılmasını tələb ediblər.
Qeyd edək ki, rəsmi məlumata görə, Bakı şəhər sakini Saday Şəkərovun (Saday Şəkərli) külli miqdarda əmlak əldə etmək məqsədilə Vergilər Nazirliyinin vəzifəli şəxsi haqqında kütləvi informasiya vasitələrində ifşaedici, onu nüfuzdan salan, uydurma yazılar yazmaqla, barəsində rüsvayedici məlumatlar yayma hədəsi ilə tələb etdiyi 10 min manat məbləğində pulu almasında şübhələr üçün əsaslar olduğundan faktla bağlı Cinayət Məcəlləsinin 182.3.2-ci (külli miqdarda əmlakı hədə-qorxu ilə tələb etmə) maddəsi ilə cinayət işi başlanıb. S. Şəkərov iş üzrə təqsirləndirilən şəxs qismində cəlb edilərək ona Cinayət Məcəlləsinin qeyd edilən maddəsində nəzərdə tutulan ittiham elan edilməklə, məhkəmənin qərarı ilə barəsində həbs-qətimkan tədbiri seçilib. S. Şəkərli Azərbaycan Yazıçılar Birliyinin üzvüdür.
Bakı Ağır Cinayətlər Məhkəməsində hakim Əfqan Hacıyevin sədrliyi ilə keçirilən prosesdə Saday Şəkərli 10 il müddətinə azadlıqdan məhrum edilib. Saday Şəkərli və vəkilləri Bəhruz Bayramov, Fəxrəddin Mehdiyev hökmlə razı olmadıqlarını, apellayasiya şikayəti verirlər.
pia.az