Şəhid olmuş hərbçilərin medalları ailə üzvlərinə təqdim olundu

Azərbaycanın ərazi bütövlüyünün qorunması və torpaqlarımızın düşmən tapdağından azad olunması uğrunda canından keçmiş 3 biləsuvarlı şəhid ölkə başçısının sərəncamı ilə dövlətimizin ali hərbi mükafatları ilə təltif olunublar

Avqustun 1-də həmin medallar şəhərin Heydər Əliyev Mərkəzində keçirilən mərasimdə şəhidlərin ailə üzvlərinə təqdim edilib.

Mərasim dövlət himnimizin səslənməsi ilə başlayıb. Daha sonra giriş sözü söyləyən Biləsuvar Rayon İcra Hakimiyyətinin başçısı Mahir Quliyev rayonda hərbi vətənpərvərlik tərbiyəsinə xüsusi önəm verildiyini, bu istiqamətdə işlərin davamlı xarakter aldığını bildirib.

Diqqətə çatdırılıb ki, Biləsuvar rayonu Qarabağ uğrunda gedən döyüşlərdə 122 şəhid verib. 114 biləsuvarlı Qarabağ əlili statusu alıb. Adı dillər əzbəri olan cəsur döyüşçü Mübariz İbrahimov isə ölümündən sonra Azərbaycanın Milli Qəhrəmanı adına layiq görülüb.

Digər çıxışlarda da Vətən uğrunda qurban gedən şəhidlərin daim ürəklərdə yaşayacağı və heç vaxt unudulmayacaqları dönə-dönə vurğulanıb.

Müdafiə Nazirliyinin nümayəndəsi, polkovnik Abdulla Qurbani isə çıxışında dövlətimiz tərəfindən torpaqlarımızın müdafiəsi uğrunda şəhid olmuş hərbi qulluqçuların şücaətinin heç də diqqətdən kənarda qalmadığını, onların ailə üzvlərinin qayğı və problemlərinin daim diqqət mərkəzində saxlandığını qeyd edib. Bildirilib ki, Azərbaycan Respublikasının müstəqilliyi, ərazi bütövlüyünün qorunmasında və hərbi hissənin qarşısında duran döyüş tapşırığını yerinə yetirərkən göstərdikləri döyüş şücaətinə görə 3 biləsuvarlı şəhid ölkə başçısının 24 iyun 2015-ci il tarixli sərəncamı ilə ölümlərindən sonra yüksək döyüş medalları ilə təltif olunublar.

Daha sonra həmin medallar şəhidlərin ailə üzvlərinə təqdim edilib. Şəhid gizir Pərvin Əliyevin ölümdən sonra təltif edildiyi “Hərbi xidmətlərə görə” medalını oğlu Riad, kiçik gizir Rahil Hüseynovun medalını isə anası Şahzadə Hüseynova qəbul edib. Şəhid gizir Şahmurad Əlizadənin ölümündən sonra layiq görüldüyü “Hərbi xidmətdə fərqlənməyə görə” 3-cü dərəcəli medalı onun anasına təqdim olunub.

Sonda çıxış edən şəhid ailələrinin üzvləri övladlarının məhz Vətən torpaqları uğrunda həlak olmaları ilə qürur hissi duyduqlarını, lazım gəldiyi təqdirdə özləri də silaha sarılaraq döyüşə atılacaqlarını bildiriblər. (apa)

pia.az