İddiaya görə çəkilişlərdə axundların pul-para söhbətləri və digər biyabırçı videoyazılar var...
Musavat.com-un elektron poçtuna sensasion bir material daxil olub. Əvvəllər də verdiyi məlumatların səhihliyi ilə seçilən mənbə qeyd edir ki, Qafqaz Müsəlmanları İdarəsində gizli kameralar aşkarlanıb. Heç demə, şeyx həzrətləri illərdən bəri öz işçilərini kamera ilə izləyirmiş.
Məlumatı ötürən mənbə bunu “Elşad Abdullayevdən sonra ikinci böyük gizli çəkiliş skandalı” adlandırır.
Bildirilir ki, bu, Azərbaycan tarixində ən böyük telequlaq skandalıdır. QMİ sədri Paşazadə QMİ-də axundların otaqlarında, Bakı İslam Universitetinin rektoru və müəllimlərin kabinetlərində, müavini Hacı Salmanın otağında və Həccə sənəd toplama idarəsində gizli kameralar yerləşdirtdirib və öz işçilərini gizli şəkildə izləyib.
Qeyd olunur ki, bu əməlin üstü bir aydır ki açılıb. Bununla belə, əməlin faş olunmasının təsadüfdən, yoxsa başqa səbəbdən təşkil edilməsi bilinmir.
Hazırda bu üzdən QMİ-də vəziyyətin olduqca pis olduğu deyilir və hamı öz arasında bu hərəkəti mənfi qiymətləndirir, müzakirə açır. Xüsusilə zaman-zaman Paşazadənin əleyhinə danışanlar narahat və qeyzlidir.
QMİ sədrinin müavini Mir Əzizin bunu bildikdən sonra Paşazadə ilə mübahisə etməsi və qəzəbindən infarkt keçirməsinin də gizli izlənmə ilə əlaqəli olduğu deyilir.
Materialda o da bildirilir ki, şeyxin sifarişi ilə gizli kameraları yerləşdirən şəxs hazırda İsveçrədə mühacirətdədir. Şeyx təlaşa düşüb ki, görəsən, həmin adam gizli çəkilişləri özü üçün bir bazada toplayıbmı. Şeyx bu barədə təhlükəsizlik mütəxəssisləri ilə də görüşüb. Onlar şeyxə deyiblər ki, bu sistem WI-FI ilə bağlı olduğu üçün sistemi quran şəxs tərəfindən başqa yerdə bazada toplanması mümkündür. QMİ içərisindəki mənbə deyir ki, əgər həmin gizli çəkilişlər başqa əllərə keçsə, bu, şeyxin sonu olacaq. Çünki orda axundların yersiz söhbətləri, söyüşləri, pul-para söhbətləri, axund təyinatlarında rüşvət söhbətləri və sair biabırçı videoyazılar var.
Digərxəbərlər
Populyar xəbərlər
