Məkkədə olan vətəndaşlarımızın QMİ-yə qarşı olan ittihamları ilə bağlı yayılan xəbərlərə reaksiya gəlib
Şeyxülislam Allahşükür Paşazadənin qardaşı, millət vəkili Cavanşir Paşazadə moderator.az-a açıqlamasında yayılan informasiyadan xəbərdar olduğunu bildirib:
“Onu yazanlar elə zənn edirlər ki, şəriət qanunları haqqında hamıdan çox bilirlər və Həcc ziyarətinin qaydalarını, vacib olan əməlləri Şeyxülislamdan, bu ziyarəti təşkil edənlərdən və din xadimlərindən daha yaxşı bilirlər. Bu cür düşünənlərə deyiləcək söz yoxdu artıq.”
Qeyd edək ki, musavat.com saytının yaydığı məlumata görə, zəvvarların narazılığı QMİ-nin onları miqata aparmamağı ilə bağlıdır:
“Zəvvarlara Bakı hava limanında niyyət etdirərək, Ciddədə ehram bağladıblar. Qeyd edək ki, həcc səfəri zamanı Məkkəyə çatan zəvvarların gəldikləri istiqamətdən asılı olaraq Məkkəyə çatmamış müəyyən məntəqələrdə həccin xüsusi geyimi olan ehram bağlaması qaydası var. Hazırda yalnız şiələr bu qaydaya riayət edərək Məkkənin qədimdən mövcud olan giriş məntəqələrinə gedərək ehram bağlayırlar. Ancaq keçən il olduğu kimi, bu il də QMİ mollaları zəvvarlara niyyət etdirərək Ciddədə ehram bağladıblar. Halbuki QMİ rəsmiləri arzu edənlərin miqata aparılacağını bildirmişdi”.