Aprel ayının hava proqnozu açıqlandı
Yaz fəsli olmasına baxmayaraq, bir neçə gündür ki, ölkəmizdə soyuq hava şəraiti hökm sürür. Maraqlıdır, soyuq hava şəraiti nə vaxta kimi davam edəcək?
Ekologiya və Təbii Sərvətlər Nazirliyinin Milli Hidrometeorologiya Departamentinin Hidrometeoroloji Proqnozlar Bürosunun baş hidroloqu Asif Verdiyev soyuq hava şəraitinin aprelin 2-dək davam edəcəyini bildirdi:
“Martın 30-u gündüz saatlarında 31-dək ölkə ərazisində qeyri sabit yağıntılı hava şəraiti davam etmiş, yağış, dağlıq və dağ ətəyi rayonlarda sulu qar, qar yağmış bəzi yerlərdə intensiz olmuşdur. Qeyd etmək istəyirəm ki, Bakıda və Abşeron yarımadasında aprelin 1-də hava şəraitinin dəyişkən buludlu olacağı, arabir tutulacağı gözlənilir. Səhər bəzi yerlərdə zəif duman və çiskin olacaq. Ancaq gecəyə doğru yağış yağacağı ehtimalı var. Aprelin 2-də də hava dəyişkən buludlu olacaq, arabir tutulacaq, bəzi yerlərdə duman olacaq, gündüz isə cənub küləyi əsəcək. Aprelin 2-də gündüz saatlarında temperatur ötən günlərlə müqayisədə bir qədər yüksələrək 7-11 dərəcə arasında dəyişəcək. Rayonlarda isə aprelin 1-də əsasən yağmursuz hava şəraiti hökm sürəcək. Gecə və səhər bəzi yerlərdə duman-çiskin olacaq. Şimal və şərq rayonlarında isə havanın yağıntılı olacağı gözlənilir. Həmçinin mülayim şərq küləyi əsəcək. Aprelin 2-də isə əsasən yağmursuz, gecə və səhər isə bəzi yerlərdə duman olacağı gözlənilir. Aran rayonlarında temperatur gündüz saatlarında 8-13 dərəcə isti, dağlıq rayonlarda isə 3-8 dərəcə isti gözlənilir. Bu gün gündüz saatlarından qərb rayonlarından başlayaraq yağıntılar tədricən kəsiləcək. Aprelin 1-2-si nisbətən mülayim hava şəraiti hökm sürəcək”.
Ümumiyyətlə, aprel ayında havanın orta aylıq temperaturunun iqlim normasına yaxın, bəzi yerlərdə isə bir qədər yüksək olacağı gözlənilir. Aylıq yağıntının miqdarının əsasən iqlim normasına yaxın olacağı ehtimalı var. Bakıda və Abşeron yarımadasında orta aylıq temperaturun 12-14 dərəcə isti olacağı gözlənilir ki, bu da iqlim normasına yaxın və bir qədər yüksəkdir. Gecələr 7-12 dərəcə isti təşkil edəcək. Gündüzlər 12-17 dərəcə isti, bəzi günlərdə 20-25 dərəcə isti gözlənilir. Yağıntı aylıq yağıntının miqdarı iqlim normasına yaxın (norma 23-33 mm) olacaq. Naxçıvan Muxtar Respublikasında orta aylıq temperaturun 12-16 dərəcə isti olacağı gözlənilir ki, bu da iqlim normasına yaxın və bir qədər yüksəkdir. Gecələr 7-12° isti təşkil edəcək. Gündüzlər 13-18° isti, bəzi günlərdə 22-27° isti gözlənilir. Yağıntı aylıq yağıntının miqdarının iqlim normasına yaxın (norma 34-59 mm) olacağı gözlənilir.
pia.az