Bakı Apellyasiya Məhkəməsində Sabunçu rayon sakini Rəyal İsmayılovun (1990-cı il təv.) CM-nin 126.2.4-cü (ümumi təhlükəli üsulla qəsdən sağlamlığa ağır zərər vurma) maddəsi ilə təqsirləndirilməsinə dair cinayət işi üzrə məhkəmə prosesi yekunlaşıb
Oxu.Az cinayət işinin materiallarına istinadən xəbər verir ki, ötən il iyunun 10-da Rəyal İsmayılov Xətai rayonunun Xocalı prospektində yerləşən “Mübarək” şadlıq evində keçirilən tanışının toy məclisində iştirak edib. Axşam saat 23 radələrində onunla bir masada əyləşən tanışları Emin Nərimanov və Eldar Əhmədovla aralarında mübahisə yaranıb, həmin söz-söhbəti şadlıq evindən kənarda aydınlaşdırdıqdan sonra, yenidən toya qayıdıblar.
Bir müddət sonra Eldar və Emin sağollaşaraq toydan çıxıblar, sərxoş vəziyyətdə olan Rəyal onların arxalarınca gedib və Xocalı parkında arxadan yaxınlaşıb heç bir əsaslı səbəb olmadan, xuliqanlıq niyyəti ilə, üzərində gəzdirdiyi bıçaqla Əhmədovun böyür nahiyəsindən 1 zərbə vuraraq, ona ağır zərər vuran bədən xəsarəti yetirib. Yaralı Kliniki Tibbi mərkəzə çatdırılmaqla həyatı xilas olunub, səhərisi gün İsmayılov Xətai RPİ 37-ci polis bölməsinin əməkdaşları tərəfindən saxlanılıb.
Məhkəmə prosesində Rəyal İsmayılov ittiham üzrə özünü təqsirli bilib və əməlindən peşman olduğunu qeyd edib.
Bakı Ağır Cinayətlər Məhkəməsinin hökmü ilə təqsirləndirilən şəxs cəzasını ümumi rejimli cəzaçəkmə müəssisəsində çəkməklə 7 il müddətinə azadlıqdan məhrum olunub.
Bakı Apellyasiya Məhkəməsi işi apellyasiya şikayətləri əsasında araşdıraraq birinci instansiya məhkəməsinin hökmünü qüvvəsində saxlayıb.
pia.az
Digərxəbərlər
Populyar xəbərlər
