Bu gün Türkiyənin Konya bölgəsində Türk və Azərbaycan Hərbi Hava Qüvvələrinin “Turaz şahini 2015” təlimləri zamanı bir hərb təyyarə qəzaya uğrayıb
Azərbaycanın Müdafiə Nazirliyi Türkiyə Hərbi Hava Qüvvələri (HHQ) ilə birgə keçirilən təlim zamanı baş verən təyyarə qəzası haqda açıqlama verib.
Nazirliyin mətbuat xidmətinin rəhbəri Vaqif Dərgahlı AzVision.az-a açıqlamasında bildirib ki, qəzaya uğrayan “F-4” E 2020 tipli hərbi təyyarə Türkiyə HHQ-ya məxsusdur:
“Azərbaycan Silahlı Qüvvələrinin heyəti tam formada həmin təlimlərdə iştirak edir. Heç bir problem yoxdur”.
Qeyd edək ki, bu gün Bakı vaxtilə saat 11:50 radələrində Türkiyə Hərbi Hava qüvvələri ilə Azərbaycanın keçirdiyi birgə “TurAz Şahini 2015” hərbi təlimləri zamanı təyyarə qəzaya uğrayıb. Qəza zamanı 2 hərbçi dünyasını dəyişib.
Virtualaz.org saytı Türkiyə KİV-lərinə istinadən xəbər verir ki, yerli vaxtla saat 09.50 radələrində Konya-Aksaray şosse yolunun 22-ci kilometrliyində, Ortakonak qəsəbəsi yaxınlığında bir təlim təyyarəsinin qəzaya uğradığı barədə anons verilib.
İlkin məlumatlara görə pilotlardan biri katapultasiya edərək xilas olub, digər pilotdan xəbər yoxdur. Konya valisi Muammer Erol pilotlardan birinin xilas olduğunu, digərinin axtarışının davam etdiyini deyib.
Qəzaya uğrayan təyyarənin hansı ölkənin hava qüvvələrinə aid olduğu hələ açıqlanmayıb. Azərbaycan Müdafiə Nazirliyinin mətbuat xidmətinin rəhbəri Vaqif Dərgahlı virtualaz.org-a açıqlamasında bildirib ki, təlimlərdə iştirak edən Azərbaycan təyyarələri və heyət üzvləri sağ-salamatdır və təlimləri davam etdirir.
pia.az