İqtisadçı ekspert adından yayılan fikirlər qalmaqal yaradıb
Avqustun 25-də Meydan TV-də “Install Service LLC” şirkətinin fəaliyyəti ilə bağlı dərc olunan məqalədə iqtisadçı ekspert Vüqar Bayramovun adından fikirlərin qeyd olunması ciddi qalmaqal yaradıb. Məqalə Meydan TV-nin veb səhifəsində Azərbaycan, ingilis və rus dillərində çap olunub.
Vüqar Bayramov “Yeni Müsavat”a açıqlamasında məqalə hazırlanarkən ondan fikir öyrənilmədiyini bildirdi: “Mənimlə heç kim məqalə barədə danışmayıb. Amma adımdan məqalədə fikirlər yer alıb. Bu beynəlxalq normalara uyğun deyil. Maraqlıdır ki, yazıda adı çəkilən şirkətin adını məqaləni ilk dəfə oxuyarkən bildim. Təsəvvür edin ki, adını bilmədiyim şirkət haqqında fikirlərim gedir. Bunlar kifayət qədər təəccüb doğurur. Xaricdə iqtisadçı ekspert kimi tanınıram. Mən Avropa Birliyində forum sədri olmuş yeganə azərbaycanlıyam. Kifayət qədər beynəlxalq əlaqələrim var. Adımdan fikirlərin qeyd olunması, məqalənin gücləndirilməsi anlamına gələ bilər. Sanki doğru olduğunu isbatlamaq üçün adımdan istifadə ediblər.
Özünü güclü şəbəkə sayan media orqanı yazısında bir iqtisadçı və mərkəzlə bağlı fikir soruşmadan istinadlar verirsə, sadəcə dəhşət bürüyür. Yazıda kifayət qədər uydurma faktlar yer alır. Əgər faktlar göydən götürülürsə, demək yazı bir adamın fantaziyası və göydən götürülmüş məlumatlardır. Söhbət burada fikir soruşulmadan adımdan istinadların getməsindən getmir. Özünə hörmət edən heç bir təşkilat hesabatında belə uydurma xəbərlər yaymaz. Rəyini soruşmadan bir iqtisadçının adından fikirlər yazılmamalıdır. Rəy öyrəniləndən sonra hər hansı bir fikirlərin qeyd olunmasına ehtiyac var. Bu şəbəkənin məqaləsi onu göstərir ki, digər məlumatları da hansısa bir şəxsin stol arxasında oturub yazdığı ”araşdırmalardan" ibarətdir".
V.Bayramov adından gedən məqalə ilə bağlı məhkəmə perespektivindən də danışdı: “Biz artıq müraciət etmişik. Meydan TV yazı dərc edən zaman öz fikrimizi bildirdik. Həmin şəbəkəyə müraciət edərək, həmin hissənin məqalədən çıxarılmasını tələb etmişik. Maraqlı tərəf odur ki, məqalənin müəllifi yoxdur. Meydan TV məqaləni dərc edən şəbəkədir. Bildirirlər ki, məqalənin müəllifini bilmirik. Sözlərindən belə çıxır ki, məqalə göydən düşüb. Əgər dediyimiz hissələr çıxarılmasa, hüququ müstəvidə həll edəcəyik. Səs yazısı, internet yazışmalarının üzə çıxarılmasını tələb edəcəyik. Bunlar ümumiyyətlə, yoxdur. Çünki heç bir rəy soruşulmayıb”.
pia.az
Digərxəbərlər
Populyar xəbərlər
