Xəbər verildiyi kimi, Milli Məclisin İntizam Komissiyasında parlamentin son iclasında spiker Oqtay Əsədovla deputat Zahid Oruc arasında yaranan mübahisəyə dünən hüquqi qiymət verilib
Musavat.com-a daxil olan məlumata görə, deputatlar bir neçə saat ərzində qərar qəbul etmək üçün müxtəlif təkliflər irəli sürüblər və məsələni sərtləşdirmədən yoluna qoymağa çalışıblar.
Aldığımız xəbərdə deyilir ki, deputat Zahid Orucun hüquqi-siyasi cəhətdən əsaslandırılmış çıxışından sonra səsvermə keçirilməsi təklif olunsa da, bir neçə deputat məsələnin daha uzlaşılmış formada həllini vacib sayaraq yenidən parlamentin sədri ilə müzakirəni məqsədəuyğun hesab edib.
Məsələ ilə bağlı İntizam Komissiyanın 28 iyun tarixli iclasında iştirak edən deputat Fazil Mustafa bu haqda ətraflı danışmaq istəməsə də, məlumatı təsdiqlədi. Deputat bildirdi ki, spiker bir neçə deputatın belə bir təşəbbüsünə qarşı həqiqətən də yüksək anlayışla yanaşıb. Bundan sonra şifahi qərarla məsələni yekunlaşdirmağa razı olan komissiya üzvləri mübahisəni daha da gərginləşdirmədən həll etməyə üstünlük veriblər. Fazil Mustafa həmkarı Zahid Orucu həmişə dövlət və cəmiyyət maraqlarını müdafiə edən dəyərli və intellektual siyasətçi kimi tanıdığını bildirib.
pia.az