Türkiyənin “Yakupoölu Deri Sanayi” (YDS) şirkəti Azərbaycan və Rusiya ordusunun əsgərlərini yüksək keyfiyyətli dəri botinkalarla təchiz etmək üçün sifariş alıb
PİA.az Türkiyə KİV-lərinə istinadən xəbər verir ki, bu məlumatı şirkətin idarə heyətinin rəhbəri Vedat Yakupoğlu açıqlayıb. O, bildirib ki, şirkət Rusiya Müdafiə Nazirliyinin ordunun tamamilə yeni versiya hərbi botinkalarla təchizatına dair keçirdiyi tenderdə qalib olub.
Söhbət mənfi 40 dərəcə şaxtaya davam gətirən, su keçirməyən və yüz faiz dəridən ibarət olan əsgər botinkalarından gedir. “Bu tender öz sahəsində dünyanın ən irihəcmli tenderi idi və onu bizim şirkət uddu. Söhbət 100 milyon dollarlıq işdən gedir. Bizim yüz faiz dəridən olan, su keçirməyən, yeni versiya botinkalarımız tenderin qalibi oldu” deyə Yakuboğlu bildirib.
Yakupoğlu deyib ki, Azərbaycan Müdafiə Nazirliyindən də 125 min cüt əsgər botinkasının satışına dair sifariş alıb. Söhbət 8 milyon dollarlıq sifarişdən gedir. YDS şirkətinin istehsal etdiyi məhsullar Fransa, Almaniya, İtaliya və s. Avropa ölkələrinə, habelə MDB respublikalarına ixrac edilir.
.