Nəqliyyat naziri Ziya Məmmədov istefa ərizəsi yazıb
Nazirin ərizəsində səhhətindəki problemlərə görə vəzifəsindən uzaqlaşdırılmasını istədiyi iddia olunur. Amma istefanın gerçək səbəbinin bu olmadığına şübhə yoxdur.
Bildirilir ki, nazir istefa ərizəsini əmək məzuniyyətində olduğu halda yazıb, bu isə onun özü ilə bağlı məlum baş verənlərdən sonra məzuniyyətdən işə qayıtmaq istəməməsi ilə izah edilir.
Xatırladaq ki, son 20 gün ərzində nəqliyyat nazirinin adı ətrafında maraqlı hadisələr cərəyan edir.
Belə ki, təkcə son iki həftə ərzində Ziya Məmmədov saysız səlahiyyətlərini itirib: taksilərə lisenziya verilməsi ASAN Xidmətə verilib; Bakı Avtovağzalına yeni rəis təyin edilib və onun nəzarətindən çıxarılıb; paytaxtda sərnişin daşınması, ondan alınaraq meriyaya verilib; nəhayət, Nəqliyyat Nazirliyinin ən nəhəng və gəlirli müəssisəsi olan "Azərbaycan Dəmir Yolları" QSC prezident fərmanı ilə nazirlikdən ayrılaraq müstəqil fəaliyyətə keçib.
Bundan başqa, məlum olub ki, "Bakı Sərnişindaşınma" MMC də Nəqliyyat Nazirliyinin nəzarətindən alınacaq. Belə ki, yaxın vaxtlarda sərnişindaşınma xidməti Nəqliyyat Nazirliyinin balansından çıxarılacaq və ayrıca qurum kimi yaradılacaq. Həmin quruma isə Bakı şəhər İcra Hakimiyyəti nəzarət edəcək.
Həmçinin bir neçə gün əvvəl məlumat yayılıb ki, Hesablama Palatası Nəqliyyat Nazirliyinin yoxlanılması haqqında qərar qəbul edib. Bununla bağlı xəbərdarlıq məktubu artıq Nəqliyyat Nazirliyinə göndərilib. Yoxlamanın nazirliyin bütün sahələrini əhatə edəcəyi qeyd olunur.
Ən son məlumata görə, Ziya Məmmədovun oğlu Anar Məmmədov Azərbaycanı tərk edib. Məlumatda deyilir ki, Anar Məmmədovun ölkədən gedişi atası ilə əlaqədar problemlərlə bağlıdır.
Bundan başqa, Z. Məmmədovun artıq hökumət tədbirlərindən izolyasiya edilməsi də adət halını alıb. KİV-in yazdığına görə, ilk dəfə bu müəmma avqustun 3-də Beynəlxalq Transxəzər Nəqliyyat Marşrutu - "Şixezi (Çin)-Dostık-Aktau-Ələt limanı" üzrə hərəkət edən "Nomand ekspress" ilk sınaq konteyner qatarının Bakı Beynəlxalq Dəniz Ticarət Limanına çatması ilə bağlı tədbirdə diqqəti çəkdi.
İlk konteyner qatarının Bakıya çatması ilə əlaqədar keçirilən və baş nazirin müavini Abid Şərifov, "Azərbaycan Dəmir Yolları" QSC-nin sədri Cavid Qurbanov, Qazaxıstanın, Gürcüstanın dəmir yolları qurumlarının, Bakı, Batumi, Aktau limanlarının, "Azərbaycan Xəzər Dəniz Gəmiçiliyi" QSC-nin rəhbərləri, diplomatik korpusun nümayəndələri və digər rəsmi şəxslərin qatıldığı qarşılanma mərasimində nəqliyyat nazirinin olmaması suallar yaratdı. Mərasimdə Z. Məmmədovu adətən dövlət tədbirlərindən kənarda saxlanılan müavini Arif Əsgərov təmsil edirdi. Qeyd edək ki, adı müxtəlif qalmaqallarda hallanan "Azərbaycan Dəmir Yolları" QSC-nin keçmiş sədri Arif Əsgərovun nəqliyyat nazirinin müavini vəzifəsinə təyin olunduqdan sonra işə çıxmadığı və hətta nazirlikdə kabinetinin müəyyən edilmədiyi barədə mətbuatda məlumatlar dərc olunmuşdu. A.Əsgərovun həmin tədbirdə iştirakı və hətta çıxış etməsinin də daha çox məcburiyyətdən irəli gəldiyi deyilirdi.
Bunun ardınca prezident İlham Əliyevin iyulun 13-də keçirdiyi Nazirlər Kabinetinin geniş müşavirəsində də nəqliyyat naziri gözə dəymədi.
Z.Məmmədovun Bakı-Sumqayıt elektrik qatarının ölkə başçısının iştirakı ilə keçirilən açılışında da olmaması nəqliyyat nazirinin hökumət tədbirlərindən izolyasiya edildiyinə dair ehtimalların təsadüfən ortaya çıxmadığını ortaya qoydu.
Məlumatlara görə, sentyabrın 1-də baş nazir Artur Rəsizadənin sədrliyi ilə Nazirlər Kabinetində 2016-cı il üzrə dövlət büdcəsinin müzakirəsində də nəqliyyat naziri iştirak etməyib. Bundan başqa, sentyabrın 16-da Nəqliyyat Nazirliyində Beynəlxalq Avtomobil daşımaları üzrə Azərbaycan-Belarus Qarışıq Komissiyasının növbəti iclası keçirilib. Belarus Nəqliyyat və Kommunikasiya Nazirliyinin idarə rəisi Sergey Dubinanın rəhbərlik etdiyi nümayəndə heyətini də Z.Məmmədov yox, Nəqliyyat Nazirliyinin Dövlət Avtomobil Nəqliyyatı Xidmətinin rəisi Elnur Abdullayev qəbul edib.
Sonuncu dəfə sentyabrın 17-də Ağsu-Kürdəmir-İmişli avtomobil yolunun Ağsu-Kürdəmir hissəsinin prezidentin iştirakı ilə keçirilən açılışına da qatılmayan Ziya Məmmədovun artıq yüksək dövlət tədbirlərindən kənarda saxlanılması barədə qərar verildiyi şübhəsizdir. Düzdür, haqqında danışılan son açılış vaxtı nəqliyyat naziri artıq məzuniyyətə çıxmışdı, amma etibarlı qaynaqdan aldığımız bilgiyə görə o Bakıdadır və əgər hökumət mərasimlərindən izolyasiya edilməmiş olsaydı, yəqin həmin açılış mərasiminə qatılardı, onu "Azəravtoyolservis"in sədr əvəzi Saleh Məmmədov əvəzləməzdi.
Qeyd edək ki, hələ iki həftə əvvəl nazirin artıq işə çıxmadığı barədə iddialar da ortaya atılmışdı. Həmin vaxt Nəqliyyat Nazirliyinin mətbuat xidmətindən verilən açıqlamada bu iddia yalanlanmış və bildirilmişdi ki, "Ziya Məmmədov sentyabrın 16-dan oktyabr ayının 22-nə qədər növbəti əmək məzuniyyətindədir".
Nəqliyyat nazirinin istefa ərizəsi yazması barədə yayılan məlumatı isə dəqiqləşdirməyə çalışacağıq.
Bununla belə, getdikcə bir ehtimalın reallaşması daha ağlabatan görünür ki, Ziya Məmmədov məzuniyyətdən işə qayıtmayacaq.(unikal)
pia.az
Digərxəbərlər
Populyar xəbərlər
