Azərbaycan kredit kollapsından yayına biləcəkmi?

Fazil Mustafa: “Əhalinin banklara olan borclarınının dövlət tərəfindən bağışlanması mümkün deyil”

“Sahibkarlığın inkişafına stimul yaradıb, kredit borclarının müddətini biraz uzatmaq olar”.

“Bu gün vətəndaşın borcunun bir qisminin silinməsi də yaxşı ənənə deyil. Çünki insanlar müəyyən mənada bunu alışqanlığa çevirib gələcəkdə yenə də belə bir məsuliyyətsizliyin altına girə bilərlər”.

Bunu deputat Fazil Mustafa PİA.AZ-a açıqlamasında qeyd edib.

Qeyd edək ki, bu gün Azərbaycan əhalisinin əksəriyyət hissəsinin banklara borcu var. Bu isə sürətlə ciddi sosial problemə çevrilməkdədir. Çünki bankların borcunu ödəyə bilməyən əhali müflisləşir. Eyni zamanda banklar da problemli kreditlər ucbatından iflasa doğru sürüklənirlər. Yəni faktiki olaraq, Azərbaycanda bank kollapsı yaranmaqdadır. Bu vəziyyətdən çıxış yolu nə ola bilər? Həmçinin bir çoxları əhalinin banklara olan borclarını bağışlamaq ideyasını irəli sürür. Bu nə qədər mümkündür? Dövlət əhalinin banklara olan borclarını dondura, ya da həmin borcları banklara ödəyə bilərmi?

Bu mövzu ilə bağlı PİA.AZ-ın əməkdaşı deputat Fazil Mustafanın fikirlərini öyrənib.

Fazil Mustafa: “Bu gün vətəndaşın borcunun bir qisminin silinməsi də yaxşı ənənə deyil”

Ölkədə yaranan bank kollapsının qarşısını almaq üçün sahibkarlığın inkişaf etdirilməsinin vacib olduğunu bildirən deputat Fazil Mustafanın fikrincə, yaranmış vəziyyətdən dolayı kredit borclarının dövlət tərəfindən bağışlanması reallığa əsaslana bilməz:

“Bu vəziyyətdən çıxmaq üçün əhalinin iqtisadi vəziyyətini gücləndirmək, müəyyən layihələri həyata keçirmək lazımdır. İlk növbədə, inhisarçılığa son qoyulmalıdır və insanlar arasında rahatlıqla “sahibkar” sözünün yetişməsinə şərait yaratmaq lazımdır. Əks halda ödənişlər borclu olacaq, banklar da ancaq dövlət qurumları ilə əlaqələrinə görə mövcudluqlarını sürdürəcəklər. Amma real bazar şərtlərinə görə hansısa üstünlükləri və ya çalışma imkanları olmayacaq. Ona görə də bu vəziyyətdən çıxış yolu sahibkarlığın inkişafından keçir. Yoxsa ki, bu gün vətəndaşın borcunun bir qisminin silinməsi də yaxşı ənənə deyil. Çünki insanlar müəyyən mənada bunu alışqanlığa çevirib gələcəkdə yenə də belə bir məsuliyyətsizliyin altına girə bilərlər. İnsanlar iqtisadi vəziyyətlərinə görə kredit borclarını ödəyə bilmirlər. Burda kiminsə başqa maddi marağı ola bilməz. Məncə belə məsələlərə daha fundamental baxmaq lazımdır. Keçici tədbirlərlə məsələni həll etmək düzgün olmaz.

Əhalinin banklara olan borclarınının dövlət tərəfindən bağışlanması mümkün deyil. Borclar bağışlananda dövlətin özünündə müəyyən dərəcədə çiyinlərində yükü olur. Ona görə də müəyyən bir qisim əhalinin borclarını silmək mümkündür, amma kimsə 10-20 milyonluq borc götürübsə, bunu necə bağışlamaq olar? Kredit borclarının silinməsini sadə istehlak kreditinlərində nəzərə almaq olar. Digər məsələlərdə böyük məbləğlərin bağışlanması çətin məsələdir. Sahibkarlığın inkişafına stimul yaradıb, kredit borclarının müddətini biraz uzatmaq olar. Bu zaman insanlar həmin vaxt ərzində toparlanıb, məsələni həll edə bilərlər”.

Gülşən ŞƏRİF

pia.az