Britaniyanın qərarının Bakı üçün əhəmiyyəti

Rumıniyalı deputat Nikolai Norikanın müəllifi olduğu sənədin  iyulun 6-da Strasburqda Avropa Parlamentinin iclasında müzakirəyə çıxarılacağı ərəfədə Aİ ətrafında cərəyan edən hadisələr Azərbaycanı da şoka salıb.

Böyük Britaniyada Avropa Birliyində qalıb-qalmamaqla bağlı keçirilən referendumda xalqın 52%-nin çıxmağa qərar verməsi ölkəmizdə də ciddi narahatlıqla qarşılanıb. Ekspertlər cərəyan edən hadisələrin Strasburqda iyulun 4-7-si arası keçiriləcək Aİ iclasının təxirə salına biləcəyi və bununla çərçivə sazişinin müzakirəsinin baş tuta bilməyəcəyi barədə həyəcan təbili çalırlar. Hazırkı durumda bu müzakirəyə böyük ehtiyac var. Özü də ittifaqla Azərbaycan arasındakı buzların əridiyi və yaxın əlaqələrin yaradıldığı bir vaxtda Britaniya xalqının qərarı bəzi suallar yaradıb.

Politoloq Qabil Hüseynli çərçivə sazişinin Azərbaycanın Aİ ilə ilk böyük saziş olduğunu bildirdi: “Sazişdə iqtisadi, siyasi və humanitar sahələrdə əməkdaşlıq öz əksini tapır. Bu saziş imzalanandan sonra ittifaqla Azərbaycan arasındakı münasibətlər yeni mərhələyə keçəcək. Viza rejimi daha da sadələşdiriləcək. Azərbaycanın Qərbə inteqrasiya prosesi sürətlənəcək. Avropa dövləti kimi Azərbaycan Avropa dəyərlərini mənimsəmə işlərini daha da tezləşdirəcək. Böyük Britaniyanın qərarında Avropa Birliyi üçün bir təhlükə görmürəm. Doğrudur, şok effekt yaradacaq. Amma qısamüddətli olacaq. Çünki Britaniya hökuməti iqtisadiyyatında problemlər gördükcə səhv qərar verdiyini anlayacaq. Tərketmə ilə bağlı qərardan sonra funt sterlinqin dəyərdən düşməsi buna bir işarədir. Köhnə müstəmləkə təfəkkürü ilə yaşayan, dərin düşünməyən siyasətçilərin fitvasına gedən xalq  səsvermədə səfeh qərarın qəbuluna kömək etdilər. Bu bumeranq effekti verəcək. Böyük Britaniya ciddi problemlər yaşayacaq. Təsəvvür edin ki, krallığa daxil olan ölkələr Avropa Birliyindən çıxmağın əleyhinə olublar. Şimali İrlandiya bundan sonra çox asanlıqla krallıqdan çıxıb, özünü müstəqil elan edə bilər. Sonra da Avropa İttifaqına daxil olar. Aİ gərginlik yaşamayacaq. Öz potensialı və ərazi ehtiyatlarına görə Ukrayna Böyük Britaniyadan qat-qat üstündür. Doğrudur, Ukrayna müharibə vəziyyətindədir, iqtisadiyyatı ağır dövrünü yaşayır. Amma NATO və Avropa Birliyinə daxil olarsa, qısa müddətdə güclü iqtisadiyyatını ittifaqa təqdim edə bilər. Gürcüstan da eyni rolu oynaya bilər. Türkiyənin özünü Avropa Birliyinə qəbul etsələr, Britaniyadan daha yüksək potensial verə bilər. Bir sözlə ittifaqın manevr etmək imkanları daha çoxdur. Azərbaycan baş verən hadisələrdən qətiyyən tərəddüdə düşməməlidir. Britaniyada millətçi baxışlar qalib gəldilər”.

Politoloq Britaniyanın Aİ-ni tərk etməsinin Azərbaycan üçün əhəmiyyətindən də danışdı: “Bundan sonra Azərbaycan, Türkiyə, Gürcüstan və Ukrayna kimi dövlətlərin əhəmiyyəti daha da artacaq. Müqəddəs yerlər heç zaman boş qalmır. Bu dövlətlər yaranan boşluğu doldurmağa hazır olacaqlar. Birliyə daxil olmaq müəyyən tələbləri, standartları yerinə yetirməyi tələb edir. Qanunvericilik, insan haqları və iqtisadiyyatın inkişafı kimi məsələlərlə bağlıdır. Heç nədən ölkələri inkişaf etmiş dövlətlərin içərisinə qatmırlar. Amma Azərbaycanın bugünkü potensialı müəyyən müddətdən sonra Avropa Birliyinə daxil olmağa imkan verə bilər”. (musavat.com)

Şahidi olduğunuz hadisələri çəkib bizə göndərin!