“Washington Times” Azərbaycana xüsusi səhifə ayırdı; Hikmət Hacızadə: “Amerika istəmir ki, Azərbaycan Rusiya tərəfə keçsin; həm də bizim aeroportlar onlardan ötrü böyük əhəmiyyət kəsb edir...”
ABŞ-Azərbaycan münasibətlərində ötən ilin sentyabrından gərginləşən münasibətlərdə yeni mərhələnin başlanması barədə müşahidələr özünü doğrultmaqdadır.
Xüsusilə də prezident İlham Əliyevin Almaniya səfərindən sonra belə fikirlər var idi ki, əslində Azərbaycan dövlət başçısının Avropada yüksək səviyyədə qarşılanması ideyasında həmmüəlliflik ABŞ-a məxsusdur və bu yolla Qərb Bakını tədricən özünə yaxınlaşdırmaq strategiyası yürüdür.
Azərbaycanın rəsmi qəzetlərində ABŞ-ın “terroru dəstəkləyən dövlət”, Obamanın isə “ikiüzlü” adlandırılmasından sonra dövlət katibi Kerrinin də sərt şəkildə tənqid olunması şəraitində ABŞ-dan verilən reaksiya ilgincdir. Amerikadakı bəzi vətəndaş cəmiyyəti nümayəndələrinin Azərbaycana qarşı sanksiya çağırışlarının ardınca Amerikanın nüfuzlu qəzetlərinin faktiki olaraq Azərbaycanın piar kampaniyasını aparması bir az da gözlənilməz oldu. Eyni zamanda ABŞ-ın bir neçə qəzeti Azərbaycanın təbliğinə yönələn, bəzən hətta Azərbaycanın rəsmi qəzetlərindəki tezislərə bənzər təbliğat yazıları ilə çıxış edib. Düzdür, burada Azərbaycan lobbisinin, Bakıdan gedən deputatların da rolunun olduğu haqda fikirlər var. Amma prosesin arxasında başqa mətləblərin dayandığı da iddialar arasındadır.
Yanvarın 29-da isə “Washington Times”ın çap versiyası Azərbaycana xüsusi səhifə ayırıb: “Azərbaycan: müstəqilliyin bərpasından 25 il sonra, ABŞ-ın çiçəklənən müttəfiqi” adlanan bölümündəki məqalələrdə Azərbaycanın ABŞ üçün əhəmiyyəti, ona dəstəyin vacibliyi vurğulanıb. Yazılardan bəziləri konqresmenlərin imzasıyla dərc olunub.
Politoloq Rasim Musabəyov deyir ki, əslində burda təəccüblü bir şey yoxdur: “Azərbaycan heç kimdən ona ağıl öyrətməyi xahiş etmir. Biz Amerika ilə tərəfdaşlığı pozmamışıq. Əfqanıstana tranzit qalır, böyük enerji layihələrində əməkdaşlıq qalır. Lakin bəzi məsələlər var ki, indiki Amerika administrasiyası onların həllindən yayınır və bizə mühazirə oxuyur. Təbii ki, cavab kifayət qədər sərt olacaq”.
Politoloq Hikmət Hacızadə də ortada barışıq məsələsinin olduğunu istisna etmir: “Hazırda Amerikanın başı başqa yerə qarışıb, ayrı cəbhədə vuruşmaq həvəsi yoxdur, ona görə də bu yolla Azərbaycanın ”saqqızını oğurlamaq", könlünü almaq istəyiblər. Hətta öz ictimaiyyətinə başa salmaq istəyirlər ki, bizim Azərbaycandakı çoxsaylı pozuntulara qarşı heç nə etməməyimizin konkret səbəbləri var. Çünki Azərbaycanın bizimçün əhəmiyyəti nəzərə alırıq, onlar bizimçün vacibdir deyə, düşmənçilik etmirik. ABŞ-da insan haqlarını yüksək tutan, buna önəm verən böyük kəsim var. Bu mesajlar əsasən onlara yönəlib. Amerika prezidentinin yumşaq siyasətinin səbəblərini bu yolla onlara başa salmağa çalışırlar".
H.Hacızadə deyir ki, neftin əhəmiyyətinin azalması Azərbaycanın önəminin azalması anlamına gəlməməlidir: “Onsuz da Amerika Azərbaycandan neft almırdı. Azərbaycan Əfqanıstan, İran məsələləri ilə bağlı aparılan siyasət üçün ABŞ-a lazımdır. Amerikanın Əfqanıstana yolu burdan keçir, ordu, mütəxəssislər bu yolla təchiz olunur. Azərbaycanın aeroportlarından istifadə edilir. Üstəlik, yəqin istəmirlər ki, Azərbaycan Rusiya tərəfə keçsin. Barışığın arxasında həm də bu amil dayana bilər. Amma məncə, əsasən Azərbaycanın aeroportları Amerika üçün əhəmiyyət kəsb edir. Dəfələrlə bu barədə deyilib. Amerika da bəyan edib ki, bizim üç istiqamətdə əməkdaşlığımız var: hərbi-strateji, iqtisadi və demokratiya, insan haqları. Sonuncu ilə bağlı əməkdaşlıq alınmır, amma hərbi-strateji əməkdaşlıq və iqtisadi əməkdaşlıq alınır. Amerika qəzetləri də ictimaiyyətə bunu başa salmaq istəyir”.(musavat.com)
pia.az
Digərxəbərlər
Populyar xəbərlər
