Poliqon Online İnformasiya Agentliyi

JURNALİSTLƏRƏ QARŞI VƏHŞİLİK...
29.7.2010

Vəhşicəsinə döyülən jurnalistlərin Reportyorların Azadlıq və Təhlükəsizlik İnstitutuna (RATİ) açıqlaması:

Zərərçəkmişlərin bildiriblər ki, “Binə” ticarət mərkəzinin direktoru Kəbirə Məmmədovanın olduğu bildirilən villa və obyektlərin şəkillərini çəkən zaman diqqətlərini yaxınlıqda olan dəbdəbəli imarət çəkib. İmarətin şəklini çəkən zaman qara rəngli “CİP” (JEEP) markalı avtomobildən düşən idmançı görkəmli şəxs onları zorla maşına mindirməyə çalışıb. Az sonra gələn başqa bir maşından da 4-5 idmançı görkəmli şəxs düşərək onları döyməyə başlayıb. “Məni ayaqlarımdan tutub bir neçə dəfə başım üstə yerə çırpdılar. Sonra şəklini çəkdiyimiz imarətə aparıb bizi orada döyməyə başladılar” – deyə Elmin Bədəlov bildirib.

“Jurnalist olduğumuzu biləndən sonra telefonla kiməsə xəbər verdilər. Telefonlarımızı alıb söndürdülər və 3 saata yaxın bizi saxladılar və dedilər ki, qoy Ziya Məmmədovun qaynı gəlsin, sizin məsələnizə baxarıq. Bir qədər sonra özünü ev sahibi kimi təqdim edən bir nəfər gəldi və bizi sorğu-sual edib telefonlarımızı qaytardı. İmarəti qanunsuz çəkdiyimizi və burada terror və ya hər-hansı bir hadisə baş verərsə məsuliyyət daşıyacağımızı deyərək, bizi 6 ay nəzarətdə saxlayacaqlarını, telefonlarımızın dinlənəcəyini vurğuladı. Həmçinin dedi ki, heç yerə şikayət etməyin” – deyən Anar Gəraylı əlavə etdi ki, fotoaparatın yaddaşında olan şəkilləri silməklə yanaşı, kartı da sındırıblar.

**

«Yeni Müsavat» qəzetinin əməkdaşı Elmin Bədəlovun başı qalmaqaldan açılmır. Bir qədər əvvəl tənqidi məqalə yazdığına görə oxuduğu Dövlət Neft Akademiyasından qovulan gənci indi də iş başında döyüblər.

İMARƏTİ ÇƏKƏRKƏN…

İyulun 28-də axşam özünü redaksiyaya çatdıranda üz-gözündə qançırlar, bədənində əziklər varmış. Üstəlik əyin-başı cırılmış və qana bulaşmış olub. Dediyinə görə, həmin gün Şüvəlanda nəqliyyat naziri Ziya Məmmədovun imarətinin şəklini çəkərkən bir neçə şəxs ona hücum çəkib.

«Birdən yanımda qara cip dayandı və ordan idmançı görkəmli şəxslər düşdü. Məni vurmağa başladılar. Bir neçə dəfə baş üstə qaldırıb yerə çırpdılar. Üzüm qanamışdı, bədən xəsarəti almışam. Sonra bizi şəklini çəkdiyimiz villanın arxa tərəfinə apardılar. Ordakı söhbət zamanı anladıq ki, villa Ziya Məmmədova məxsusmuş…»

«KÜLƏK TƏRS ƏSSƏ SİZ CAVABDEHSİNİZ»

Elmin Bədəlov çəkilişə tək getməyib, onun yanında başqa jurnalist, «Milli yol» qəzetinin və pia.az saytının redaktoru Anar Gəraylı da olub. O da fiziki təzyiqlə üzləşib. Amma dediyinə görə, daha çox həmkarı döyülüb.

Anar Gəraylı: «Sonra məlum oldu ki, aparıldığımız ev Ziya Məmmədovundur. Bizə dedilər ki, qanunsuz şəkil çəkmisiz, bura önəmli yerdir, burda terror baş verərsə, külək tərs əsərsə, siz cavabdehsiz… Nəsə, fotoaparatın yaddaş kartını sındırdılar. Sonra da Elminə 20 manat pul verdilər ki, get təzəsini al. Bir də dedilər ki, ərazini çəkdiyiniz üçün sizi altı ay izləyəcəyik, telefonlarınız da dinlənəcək».

NƏQLİYYAT NAZİRLİYİNDƏN DEYİRLƏR Kİ…

Nəqliyyat Nazirliyi mətbuat xidmətinin rəhbəri Namiq Həsənov AzadlıqRadiosuna bildirib ki, həmin imarətin Ziya Məmmədova məxsusluğu haqda heç nə deyə bilməz. O, sadəcə, nazirliklə bağlı sualları cavablandırır. Amma o da bu fikirdədir ki, jurnalistin iş başında döyülməsi yaxşı hal deyil:

«Hər halda, bu işi hüquq-mühafizə orqanları araşdırmalı və son sözü də onlar deməlidirlər. Yəqin o zaman başqa suallar kimi həmin imarətin kimə məxsusluğu kimi suala da aydınlıq gələr».

İyulun 29-da hadisənin baş verdiyi yerdə çəkiliş aparan bir qrup jurnalistə villanın nəqliyyat nazirinə yox, bir əcnəbiyə aid olduğu deyilib. Amma az sonra Elçin Quliyev adlı şəxs zəng edərək özünü həmin evin sahibi kimi təqdim edib və Ziya Məmmədovun sadəcə, qonşusu olduğunu söyləyib. Mühafizəçilərsə Elmin Bədəlovun təxminən 7 metr hündürlükdə olan hasara dırmaşdığını deyiblər:

«Hasara dırmaşanı döyərlər də…»

«QANUNDA DEYİLMİR Kİ, JURNALİST DÖYÜLƏNDƏ NEYLƏMƏK LAZIMDIR»

Jurnalistlərə villanın nəqliyyat nazirinə yox, bir əcnəbiyə aid olduğu deyilibDaxili İşlər Nazirliyi mətbuat xidmətinin əməkdaşı Ehsan Zahidov isə deyir ki, qəzet əməkdaşı döyülməsi ilə bağlı polisə müraciət etməyib. Bu üzdən də araşdırma başlanmayıb:

«Qanunda deyilmir ki, jurnalist döyüləndə neyləmək lazımdır. Vətəndaşdır döyülübsə, rəsmi qaydada aidiyyatı qurumlara müraciət etməlidir».

«Yeni Müsavat» qəzetinin baş redaktoru Rauf Arifoğlu isə iyulun 29-da daxili işlər nazirinə və Xəzər rayon Polis İdarəsinin rəisinə rəsmi şəkildə müraciət etdiyini bildirir. Ehsan Zahidovun sözlərinə görə, əgər məktub yazıblarsa, araşdırılıb müraciət müəlliflərinə cavab veriləcək. O həmçinin kütləvi informasiya vasitələrindən gələn müraciətlərə diqqətlə yanaşıldığını da söyləyir.

«HALBUKİ PREZİDENT DEMİŞDİ Kİ…»

Rauf Arifoğlu baş verənlərisə bu cür qiymətləndirir:

«Növbəti dəfə jurnalistlər döyülüb. Həm də çox amansızlıqla. Halbuki bir neçə gün öncə prezident demişdi ki, jurnalistlərə qarşı zorakılıq yolverilməzdir. Həm də iş başında. Görünür, o reportajın hazırlanması kiminsə xoşuna gəlməyib və jurnalisti döyməklə cinayət əməlinə verib…»

ŞƏXSİ SİRR YAYILMIRDISA, ÇƏKİLİŞ APARMAQ OLARDI

Media Hüquqları İnstitutunun direktoru Rəşid Hacılının sözlərinə görəsə, jurnalistin çəkilişinə yalnız o zaman qadağan qoyula bilərdi ki, bu şəkillər şəxsi həyatla bağlı gizli məlumatın yayılmasına xidmət edəydi. O ki qaldı terror təhlükəsi olduğu üçün mühafizəçilərin işə qarışmasına, Rəşid Hacılı deyir ki, bu, sadəcə bəhanəyə bənzəyir. Hətta belə bir təhlükə olsa belə onu izah etməyin yolları var.

Hüquqşünas Ələsgər Məmmədli isə deyir ki, məsələ bir qədər mürəkkəbdir. Əvvəlcə müəyyənləşdirilməlidir ki, ev kimə aiddir:

«İctimai fiqurun və ya tanınan, diqqət mərkəzində olan şəxslərin özəl həyatı başqaları ilə müqayisədə qanunla az qorunur. Bu halda çəkiliş mümkündür. Amma tanınmayan şəxsdirsə onun icazəsi olmadan foto çəkmək olmaz».

Amma hüquqşünas deyir ki, bu halda belə jurnalisti döymək lazım deyildi, sadəcə, hüquq-mühafizə orqanlarına müraciət edilməliydi. Və polis vəziyyəti aydınlaşdırmalıydı. İndiki halda isə jurnalistə fiziki xətər yetirilib və onun işinə mane olunub. Buna görə də Cinayət Məcəlləsinin 163-cü maddəsi ilə iş açılmalıdır».(azadlıq radiosu)

**
Sırasında "Azadlıq" və BBC radiolarının əməkdaşları da olmaqla bir qrup jurnalist dünən "Yeni Müsavat"ın əməkdaşı Elmin Bədəlovun və pia.az saytının redaktoru Anar Gəraylının döyüldüyü məkanda olublar. Mərdəkanda yerləşən "qan çanağı"na gedən jurnalistləri mühafizəçilər qarşılayıblar. Bu barədə musavat.com-a "Yeni Müsavat" qəzeti baş redaktorunun I müavini Azər Ayxan məlumat verib.

A.Ayxanın sözlərinə görə, onlar jurnalistlərin döyülüb-həbs edildikləri evin qapısını döydükdən sonra mühafizəçilər qapını açıblar: "Biz gəlişimizin məqsədini dedik, jurnalistlərin nəyə görə döyüldüyü ilə maraqlandıq. Cüssələri etibarilə Remboya oxşayan idmançılar bizə dedilər ki, məgər burada Rembo-zad var ki, adam döyə. Sözümüz çəpləşdi, mübahisə başladı. Daha sonra söhbət yerinə başqaları da gəldi. Elmin onu döyənlərdən birini tanıdı. Onların içində özünü Elçin Quliyev kimi təqdim edən bir nəfər vardı, o dedi ki, Ziya Məmmədovun qohumu deyil, bağ qonşusudur və dünən jurnalistlər onun hasarının üstünə çıxıb şəkil çəkiblər, ona görə də döyülüblər".

Azər Ayxanın dediyinə görə, daha sonra həmin şəxslər bir qədər yumşalıblar və bildiriblər ki, bir işdir olub: "Onlar üzr istədilər, dedilər ki, anlaşılmazlıq olub".

Bununla belə, vəhşicəsinə döyülüb-təhqir olunmasını, qanunsuz olaraq 3 saatlıq həbs edilməsini bağışlamayan jurnalist hadisəyə görə hüquq-mühafizə orqanlarına müraciət etməli olub. A.Ayxan musavat.com-a bildirib ki, onlar hadisə yerində şəkil çəkəndən sonra Xəzər rayon Polis İdarəsinə gediblər və Elmin Bədəlov başına gələnlər barədə ifadə verib. (musavat.com)

Nəzərə çatdıraq ki, redaktorumuz Anar Gəraylı ev şəraitində həkim nəzarətində olduğu üçün hadisə yerinə gedə bilməyib. Onu da bildirək ki, əldə etdiyimiz məlumata görə, jurnalistlərə təzyiq edən şəxslər məsuliyyətdən yayınmaq üçün deyiblər ki, guya, bugün günorta saatlarında hər iki jurnalist hadisə yerinə gedərək, ev sahibindən üzr istəyib.
Bu açıqlama ilə bağlı Elmin Bədəlov və Anar Gəraylı bildirdilər ki, bu kökündən yanlış fikirdir, hadisəni törədənlər elədikləri vəhşilikləri ört-basdır etməyə çalışırlar.
Hər iki jurnalist bunu birmənalı olaraq təkzib edir.

**

İyulun 28-də «Yeni Müsavat» qəzetinin əməkdaşı Elmin Bədəlov və pia.az saytının redaktoru Anar Gəraylının döyülməsi ilə bağlı daxili işlər nazirinə, Xəzər rayon polis idarəsinə və jurnalist təşkilatlarına müraciət edilib. Elmin Bədəlovun döyülməsi ilə bağlı ona göstərilən ilkin tibbi yardım müayinəsi sənədləşdirilib, həmçinin, onun ekspertizadan keçirilməsi planlaşdırılır.

Daxili İşlər Nazirliyi mətbuat xidmətinin əməkdaşı Ehsan Zahidov isə bildirdi ki, müraciət daxil olandan sonra araşdırılması uyğun xidmət qurumuna həvalə olunacaq və araşdırmaya başlanılacaq.

Həmçinin, redaktorumuz Anar Gəraylı da məsələ ilə əlaqədar Reportyorların Azadlığı və Təhlükəsizliyi İnstituna da müraciət edib.

**

İyulun 28-də saytımızın redaktoru Anar Gəraylı “Yeni Müsavat” qəzetinin reportyoru Elmin Bədəlovla birgə Xəzər rayonunda yerləşən Şüvəlan qəsəbəsində məmurların villaları yerləşən məhəllədən reportaj hazırlayarkən, fiziki təzyiqə məruz qalıb. Villalardan birinin şəklini çəkmək istəyərkən mühafizəçilər tərəfindən fotoaparatı alınan Elmin Bədəlov əməkdaşımızla birlikdə bir neçə saat saxlanılıb.

Sonradan Nəqliyyat naziri Ziya Məmmədova məxsus olduğu bilinən villanın mühafizəçiləri Elmin Bədəlova məxsus fotoaparatın yaddaş kartını çıxararaq, çəkilmiş şəkilləri siliblər.

Bundan əlavə jurnalistlərlə kobud rəftar edərək, onlara fiziki təzyiq edən villanın mühafizəçiləri “Yeni Müsavat” qəzetinin reportyoruna ağır bədən xəsarəti yetiriblər.

Redaktorumuz və Elmin Bədəlov villanın mühafizəçilər tərəfindən bir neçə saat saxlanıldıqdan sonra, məlum obyektin sahibi olduğu deyilən şəxsin hadisə yerinə gəlməsi nəticəsində sərbəst buraxılıblar. Jurnalistlərə məxsus fotoaparatın yaddaş kartını sındıran mühafizəçilər onları buraxarkən bunun əvəzində 20 manat məbləğində pul veriblər və fotoaparat üçün yeni yaddaş kartı almağı “tövsiyyə ediblər”.

Sərbəst qaldıqdan sonra “Yeni Müsavat” qəzetinin redaksiyasında halı pisləşən Elmin Bədəlovun vəziyyəti təcili tibbi yardım işçilərinin müdaxiləsi nəticəsində normallaşıb.

Hadisənin araşdırılması ilə bağlı bağlı hüquq-mühafizə orqanlarına müraciət edilib.

doyulan jurnalistlar (7) by IRFS PHOTO.

pia.az

438 dəfə oxunub