
SEVGİLİLƏR ABŞ-A QAÇIB
Azərbaycanın nazirlərindən birinin həyat yoldaşı onu tərk edərək sevgilisi ilə ABŞ-a gedib. Bu sevgili Bakının fitness mərkəzlərindən birinin bədən tərbiyəsi üzrə məşqçisi olan yapon çıxıb. Bu barədə “Turan”a məlumatlı mənbə bildirib.
Mənbənin məlumatına görə, nazirin ailəsində yaranan ixtilafın səbəbi məlum deyil. Lakin yaxınları uzun müddət nazirin arvadını bu fikirdən əl çəkməyə, ərini və ailəsini biabır etməməyə çağırıblar. Buna baxmayaraq, Azərbaycan hökumətinin üzvlərindən birinin karyerası faktiki olaraq böyük sual altındadır. Adı bəlli olmayan nazirin taleyi tükdən asılıdır.
Eyni zamanda Azərbaycanda boşanmadan sonra dövlət məmurlarının karyerasının uğurlu şəkildə xilas edilməsinə misallar var. Belə ki, ictimaiyyətin yaxşı tanıdığı nazir müavinlərindən biri uzun müddət hakimiyyətin ən yuxarı təbəqəsinin nümayəndəsi olan qadınla evli olub. Bir neçə il əvvəl isə o, boşanıb, amma vəzifəsini qoruyub saxlaya bilib.
Xatırladaq ki, bir neçə gün öncə azərbaycanlı nazirlərdən birinin xanımının ərini ataraq öz idman müəllimi ilə qoşulub qaçması barədə məlumatlar yayılmışdı. (musavat.com)