Azərbaycanlı diplomatlar Diaspor Gənclərinin II Yay düşərgəsində olublar

Azərbaycanın ATƏT-dəki daimi nümayəndəsi, Avstriyadakı fövqəladə və səlahiyyətli səfiri Qalib İsrafilov, Azərbaycan Respublikasının Türkiyə Respublikasında fövqəladə və səlahiyyətli səfiri Xəzər İbrahim “Nəsimi-650 Diaspor Gənclərinin II Yay Düşərgəsi”nin iştirakçıları ilə görüşüblər. Görüşün əsas mövzusu “Azərbaycanın xarici siyasətində diaspor fəaliyyəti və gənclərin rolu” olub. Diplomatlar gənclərə maraqlı məlumatlar verdikdən sonra geniş fikir mübadiləsi aparılıb.

PİA.az diaspor.gov.az saytına istinadən xəbər verir ki, düşərgədə müxtəlif mövzularda görüş və təlimlər davam edir. Tarixçi alim Solmaz Tohidi “Azərbaycanın 100 illik tarixi” mövzusunda, nəsimişünas alim Səadət Şıxıyeva İmadəddin Nəsiminin yaradıcılığı ilə bağlı məlumat veriblər.

“Nəsimi 650 Diaspor Gənclərinin II Yay Düşərgəsi”nin iştirakçıları Xocalı qətliamında hər iki valideynini itirən gənclərlə, “Dağlıq Qarabağ Bölgəsinin Azərbaycanlı İcması” İctimai Birliyinin sədri Tural Gəncəliyevlə də görüşüblər. Yüksək vətənpərvərlik əhval-ruhiyyəsində keçən görüş iştirakçılarda böyük təəssürat yaradıb.

Düşərgədə məlumat sessiyalarının biri Dövlət Miqrasiya Xidmətinin fəaliyyətinə, ümumiyyətlə dünyada miqrasiya siyasətinə həsr olunub. Digər bir görüş Yüksək Texnologiyalar Parkı və bu sahədəki yeniliklərdən bəhs edib. Parkın direktoru Tural Kərimli mövzu ilə bağlı ətraflı məlumat verib.

Diaspor gənclərinin Şamaxının Dəmirçi kəndinə və Safari Parka ekskursiyaları da yaddaqalan olub.
Düşərgədə ünsiyyət bacarıqları, natiqlik və fərdi inkişaf təlimləri, eyni zamanda “Azərbaycanı tanı” yarışması da təşkil edilib.

Düşərgə iyulun 14-ə kimi davam edəcək.