İcra başçısı Prezidentin ayırdığı 1 milyonu “Vaqif”in əli ilə necə xərcləyir...

Adminstrasiyanın məsul şəxsləri həyata keçirilən işləri gördükdə təəccübləniblər. Belə ki, Prezident İlham Əliyevin Beyləqana son səfərində rayonun abadlaşdırılması üçün 1 milyon manat vəsait ayırıb. Həmin vəsait xərclənməsi üzrə keçirilən tenderdə isə qalib rayon icra başçısı Asif Ağayevin yaxın adamı olan Qəhrəman Qəhrəmanova məxsus “Vaqif” firması oldu. Bu barədə bir müddət əvvəl ölkə mətbuatında məlumat dərc edilmişdi. Həmin məlumatda vurğulanır ki, haqqında hər hansı bir məlumat olmayan firma ilə Beyləqan Rayon İcra Hakimiyyəti arasında 1 milyon manatlıq müqavilə bağlanılıb. “Vaqif” firması ilə bağlı yazılanlara cavab olaraq isə Beyləqan İcra Hakimiyyətinin yaydığı məlumatda qeyd edilirdi ki, adı çəkilən firma 20 ilə yaxındır səhiyyə və təhsil sahəsində davamlı olaraq fəaliyyət göstərir.

Ayrılan 1 milyon vəsaitin necə xərclənməsi ilə bağlı Beyləqandan Pravda.az-a daxil olan məlumatda qeyd edilir ki, “Vaqif” firmasının rayonda apardığı abadlıq quruculuq işləri həddindən artıq bərbad halda olub. Asif Ağayevin kanalın kənarında salmaq istədiyi parkın ərazisinə qoyulan asfalt örtüyündən tutmuş, yerə döşənən tametlərə qədər bütün işlər bərbad vəziyyətdədir. Məlumatda vurğulanır ki, Adminstrasiyadan gələn yoxlama icra hakimiyyətinin başçısı Asif Ağayevə xəbərdarlıq ediblər ki, yaxın vaxtlarda Prezidentin Ərazi-təşkilat məsələləri üzrə köməkçisi-şöbə müdiri Zeynal Nağdəliyev görülən işlərlə tanış olmaq və ayrılan vəsaitin necə xərcləndiyini yerində müşahidə etmək üçün rayona səfər edəcək.

pia.az